北京居酒屋 ：萬火

8月19日出差到北京，行前上網搜尋下有乜好嘢食，見 TimeOut Beijing 選的年度最佳餐廳之一，是一間居酒屋，中文叫「萬火」，而且就在我住的酒店附近，所以打電話去訂定位。
佢個位置幾騎呢，行到去也找不到，要打電話問佢地，竟然係在一個牙科疹所的招牌轉入小路內的一間小屋，若果唔係 TimeOut 佳選，真係以為係黑店。
外面殘舊，入便另有一番天地。裝修相當西式，有吧台和長餐枱，主理人是日本人頗年青，本地人伙記也全部是年青而有禮好招呼，入坐後向店員說這裡很難找，他笑著說食品一定令你滿意的，好。

佢地好多清酒、燒酌、也有紅、白酒及其他烈酒。我一個人，只好叫啤酒，佢地有部機可以在啤酒上攪出像雪糕的一大層泡，我驚攪肚，都係叫一般生啤。

佢地主打是串燒，也有多種下酒的冷菜和熱食。
我叫的冷菜係：冷豆腐，豆腐上面舖咗一層蔥碎、黑椒和畧有一點油，非常和味。青瓜配麵豉醬，一般。

串燒（每樣10-20元人記）：鷄肝一般，燒蒜頭幾好。鷄翼相當正，15蚊人民幣2只呀，平到笑。最特別係燒山藥，山藥切成片燒完揸上汁加wasabi，然後放在一片紫菜上，夾著食，好好味，山藥又夠爽！

燒牛肉最貴啦，55元，但比較靭。

燒飯團有幾種，我叫了柚子鱈魚子味，太咸。

總結：確係有特式的居酒屋，大部份人客都是下了班的日本人，飲酒吹水，氣氛幾好，食物不錯但每樣醬汁都偏咸。招呼不錯，是一個新發現。

地址：麥子店街8號北側平房（近農展北路）。
電話：010-65085517