倫敦遊後記一堆

有一晚到China town吃晚飯，順便睇下當地被強國人盤據的近況。好多唐人街老店都執咗，周圍都係賣大陸菜、強國菜（大陸人造俾大陸人食的便是大陸菜，門面高級D叫強國菜）。旺記依然在。

市中心很多大小名店，都貼福字或馬到功成poster ，強國人以鈔票展現軟實力有功效啦，拉喼大隊觸目皆是。
倫敦地鐵在2月5-6日罷工二天，加上落雨，多得佢唔小。

在倫敦閱報，話Heston Blumental 在文華東方的餐廳，又發生客人食物中毒，要休業2-3星期清潔。

我感受最深，係在英國班馬線過馬路，無論係私家車或營業車司機、不管交通擠塞或輰通，司機都一定在班馬線前停車讓路人過馬路。返到香港，九成司機在班馬線見有人過馬路都唔會停車！

Casa Brindisa

2月2日晚到呢間西班牙 tapas 餐廳吃晚餐。佢地有很多種西班牙 shelly 酒、紅酒、白酒。

先叫一份24月的火腿，店員介紹catalan 的特色多士Pan De Coca，用嚟餸火腿，火腿𣎴錯，多士真係幾特別，底烘得有少少似香脆麪包皮，上面加大量橄欖油和小小蕃茄碎，好好食。

我叫了一杯 shelly，真係幾好飲，介乎砵酒與葡萄酒之間，沒有砵酒的苦味。
跟著叫燒八爪魚腳，D鬚幾粗，可惜唔爽口兼無乜味，下面一大舊薯容。

佢地仲有很多款 tapas，未有機會試。

今次倫敦遊也沒有機會去試另一加 tapas 店 Dehesa，希望以後有機會。

Petrus, London

呢間倫敦的 Petrus 同香港 Petrus 無關，倫敦的 Petrus是 Gordon Ramsey 開的法國餐廳，獲米芝連一星。我早一個月訂定2月6日去吃午餐。

其位置從 Harvey Nichols 行約15分鐘，唔係靠住先印定的 Google Map 都好難找，附近看來有兩、三間其他高級餐廳。
我叫五道菜的 tasting menu ，先來的 Amuse Bouse，係一 pat 芝士，上面幾條醃過的瓜菜，芝士應該係羊奶芝士，幾騷，唔啱我。

第一 Starter 係鵝肝，好夠味，也是表面有D甜汁，配上果汁啫哩，味道傳統，外觀摩登。

第二 Starter 係煎帶子兩隻，好大隻好夠味，但不及香港常能吃到的北海道帶子，伴的醬汁超級好味但難以形容是什麼，帶子下面仲有一小條醃過的 anchovy 小魚，再有D椰菜花容，好得。美中不足帶子有一面煎得過籠。

主菜可以選燒乳豬或鴨胸鴨肶，我揀燒乳豬，其實係燒豬腩，皮脆肉嫩，但外觀畧差，山長水遠來吃鬼佬燒腩仔。

第一甜品可以 sorbet 和芝士，二揀一，我叫sorbet ，好好果汁味，唔酸，下面係某種莓，和兩片檸檬味的薄餅，一個好幼的圈插在 sorbet  內，好睇又好食。

第二甜品係chcolate sphere ，一個空心的薄朱古力球，上桌時侍應淋上熱朱古力漿，咁個球慢慢溶，見入面仲有 vanilla 雪糕，和一D caramel 糖。個朱古力漿好夠朱古力味而唔太甜，超級好睇好食。

總結，從訂位，入口招呼，到食完埋單，全部完美。跟 Chez Bruce 比較，我覺得 Petrus 雖然畧貴，但食味和外觀 Petrus 都整體高一班。

HIX Oyster & Chophouse, London

星期日中午到 Farringdon 的HIX吃午餐，佢地主要供應老式英國菜，星期日就有 Sunday Roast ，主要是燒牛肉。

我叫三道菜的午餐，加四隻生蠔，D蠔樣子不佳，很瘦無乜肉，好重金屬味。

頭盤有三小碟：煙三魚攪成醬，好重煙熏味，但偏咸。煎洋蔥，好似有D鵝油或鴨油味，但經理話無用鵝油、鴨油。牛肉面珠，似風乾牛肉，配薏米。三樣都好食。

主菜我叫燒牛肉，配以yorkshire pudding、燒薯仔、炒的 sprout、焗耶菜花等，個yorkshire pudding 無我以前食的咁好，其他都ok。

我見有其他兩枱客叫隻燒鷄，隻鷄倒轉插入一個柱體，兩隻鷄腳朝天撐直，似乎係佢地招牌菜。

結論普普通通，可以接受。英國有很好食材，但煑法變化不多。

Fish Market, London

2月4日到呢間在 Liverpool Street  車站附近的餐廳吃午餐，顧名思義，呢度專食海鮮，每日有不同冰鮮魚。

我見佢地有全隻蟹才賣£14.5，所以叫一隻做頭盤，都幾大隻，D肉好鮮甜尤其兩隻鉗的肉，有D淡黃色膏亦好夠膏味。另外一份螺，都ok。佢地的螺、小蝦等都是以 1/4 pint 的郎口盅裝住上桌，幾得意。

主菜我叫煎龍脷，不是最正個種，佢地另有寫明 Dover Sole ，就要三十幾鎊一條。我的煎龍脷都ok。

總結：嘢幾好食，招呼也很好。

Chez Bruce

2月3日晚到 Wandsworth Common 的 Chez Bruce 吃晩餐，此店係米芝連二星法國餐廳，幾年前劉健威也介紹過。 ZAGAT London 給其總體評分比 Fat Duck 還高。該小鎮要由 Victoria 坐火車約十五分鐘，到Wandsworth Common站下車步行約五分鐘便到，比想像中方便。
餐廳擺設畧摩登，裝修整潔、光猛。

他們只供應三道菜的晚餐，每道有六、七樣嘢揀。
頭盤我叫一個 tart ，tart本身就夠熱和香口，上面有D像肉醬的東西，再上面有煎的鴨肝和鴨心，我都係第一次食鴨心，幾ok，仲有兩粒旅小的蛋，好似鵪𪂹蛋，溫泉蛋造法，不過無乜味，另有兩小粒洋蔥仔，最上面係白色像筍的小條，撈咗D帶芥末的汁，好好食。英國佬做批做達都有一手。

主菜因為唔想叫魚和鷄胸，牛肉又只有兩位份量，所以叫燒鴿，上桌熱辣辣，好香，皮脆但入面D肉仲係有D紅有DD血水，但肉好林好滑。配菜有一舊煎鵝肝，好油但好夠味，上面有D甜汁好味。

甜品都係大路嘢，我叫 creme brulee，算ok。

總結：可能期望很高，所以雖然係好食，仍不覺得特別好。

St. John, London

2月1日星期六，到我去過很多次的St. John吃晚餐。

呢次見幾個廿幾卅的強國人遊客，以前沒有在此店見強國人，日本人則每次都有二、三枱，今次卻沒有日本人客。

頭盤我叫一客白豆煑墨魚，唔夠熱，伴碟果 pat 白色嘢係英國芥辣做的，少少酸，能幫助開胃。

主菜，我都係叫吃過很多次的煎龍脷，今次煎得畧為太熟，也很多骨。

甜品中有Blood Orange Jelly，我專登叫嚟睇下係乜，原來是一舊紅色果汁啫哩，伴以一片紅和一片橙色浸過糖水的橙肉，一舊白色 mousse。算ok。

Brunch @ Hélène Darroze, London

年初二早上到達倫敦作幾日假期。
早排偶然見呢間米芝連餐廳在星期六、日有 Brunch 。所以訂定位第一次在倫敦吃 brunch, 我早幾年在巴黎總店（米芝連2星）吃過，印象極好。
倫敦店在高級酒店 Connaugh 內，場不是很大 。三道菜的Brunch 收55鎊頭盤和甜品是自助式，主菜四揀一。

各種自助頭盤，用料都算上等，但選擇不多，主要是火腿和肝醬。麪包選擇多和好食。主菜我叫蛋，是兩隻poach eggs，伴乾蕃茄和肉碎做的醬汁，上面各淋D泡，好好食。

甜品以西餅為主，由於頭盤已經吃了很多，所以甜品只要了一件朱古力餅仔。

總結，食物好，招呼一流（可惜有D難聽明的口音，這是倫敦食店、酒店的難處，店員都是東歐人），坐位舒適，同樣價錢在香港未必享受到。

Dinner by Heston Blumental

這次來倫敦，一早訂好 Heston Blumental 在 Mandarin Oriental 開了不久的餐廳。
看餐牌介紹，每度菜都是17、18世紀的古菜改造，古古怪怪，但不是 Fat Duck 果種科學怪人菜。

頭盤我點一個 Marrowbone , 侍應講咗一輪點樣點樣煑，我都聽唔明。個菜上桌，唔識形容點味，總之好睇唔好食。

主菜按侍應的介紹，叫 slow cooked Hereford ribeye, 舊牛肉真係好淋好好味，個汁咸咗啲。

甜品，左邊是一個索咗酒的鬆糕，面焗過，右邊是一舊燒過的菠蘿，小小酸甜。

總結，很失望，價格遠超享受，不會再來。
這次在倫敦很明顯感覺到，服務行業，不管是酒店或高級餐廳，很多服務員都是東歐人，講的英文好難明，在巴黎和波爾多的酒店和餐廳，服務員的英文雖然帶法國口音，反而更易聽得明。

倫敦9月22日

昨天整天天陰下雨，今日就天郎氣清。
早上十時左右到 Portobello Market 逛下，到了 Nottinghill Gate 站已經人山人海，絶大部分是南歐和東歐遊客，強國人和中東豪客對買街邊嘢無興趣。依家咁很多人，更有街頭樂隊表演，行都行唔到。
之後到 Borough Market 行下街巿，人多但每次都見到特別食材，今次見有一檔專賣菌菇的攤檔，竟然有來自東歐的新鮮黑木耳。

Borough Market 周邊有很多小食店、餐廳、 wine bar 等，我揀了一家吃炸魚薯條作午餐。

餐後沿河畔，行十分鐘左右就到了 Tate Modern Gallery，我也是第一次來Tate Modern ，這次沒有甚麼特別展覽，行一陣就走人。

趁著天氣好，到 Kingsington Palace Gardens 行一陣，草地任踏。

倫敦9月21日

今日天陰下雨，在巿區行下公司和唱片舖。中午到唐人街吃午飯，我揀咗畔溪小館（Mr. Kong's), 我叫了一個牛腩煲、一碟炒白菜仔、一碗白飯，埋單都要成20鎊。
旁邊桌子來了一個強國人，一個人叫滿成桌餸菜，個伙記話呢個客常常英國、強國兩邊走，次次嚟都係一個人叫滿成桌餸菜。

 

St John, London

我近年到倫敦都會來呢間以食內贜和骨髓著名的餐廳 St John，蔡瀾介紹過，最近梁文道都寫過，其實佢地的海鮮也極水準，我反而未食過呢度的牛骨髓。
9月20日到倫敦便來吃晚餐。
頭盤我叫Smoked mackelrel 鬼佬薰重，少少咸，幾好。個伴菜係撈了wasabi 的瓜。
主菜叫了煎龍脷，上桌聞到煎香味，表面脆入面啲肉又軟而嫩，呢條煎龍脷的水準極高，簡簡單單，全靠煑功，果個叫 tartrate sauce的醬更加好味，唔識形容，畧有啲辣味，有啲熟蛋白碎，看來想 mayonnaise ,但不是mayonnaise果種一味酸的 cheap味。這碟魚，連 side dish 的煑菜都是印象中極高水準的食物。
甜品無乜吸引力的品種，我叫了 Apple Crumble，入面的蘋果醬太酸。