すい月 先斗町店 納涼床料理

9月30日從白浜回到京都，晚上到先斗町的「すい月」吃料理。
整條先斗町、及木屋町通，在鴨川旁的料理店，從五月到9月尾都會向河邊的露天坐位稱為納涼床，有些是傳統的、客人席地而坐，在小桌子吃喝，有些大的料理店是把桌椅搬到戶外，沒什特式。

我前幾晚未去白浜前，已經去觀察過，選了這間すい月，佢地係供應典型的居酒屋食物。

佢地的戶外坐位不多，桌與桌之間僅有4-5時空間，而我旁邊的兩日男又不段抽煙！
食物卻有驚喜，少有地好吃。我叫了腐竹壽司（其實係腐竹卷）、煙鴨胸肉（超好味而不靭）、燒鷄（一舊鷄胸，皮㥛脆，下面是瘦的鷄胸肉，而入味，比廣東炸子鷄好吃）、鍋燒雜菜（唔識點解，好好味，兩舊豆腐軟滑而不容夾碎）、燒飯團。佢地食物份量不大，可以多試幾樣。

總結，很好食，不是一般居酒屋一味多落醬（博你飲多D），侍應都是靚仔靚女，會簡單英語，招呼良好，menu 有中、英文對照，完全滿分的一頓，要扣分都係扣自己：咁好食咁有氣氛卻一個人吃！

白浜景點

9月29日早上，食了早餐、浸完溫泉，從酒店步行5分鐘到千疊敷，這是海旁被海浪經過多年沖蝕而成，除了像東坪洲個種橫層、還有很多奇型怪狀好得意，坐下來欣賞海浪，也有人站在岩上釣魚。

再步行五分鐘是三段璧，這是海邊懸厓，厓下有一個洞，有遊客坐船從海上觀賞。

中午坐巴士到 tori tori 海鮮市場，據稱係關西最大。內裏除了海鮮，也有各種果菜、醃菜、手信、酒等。還有食物檔，當然賣魚生檔有一份份的魚生，可以即食。門口有一間 BBQ 舖，但好似韓式烤肉咁，我最懷念幾年前到青森八戶的海鮮市場，有燒烤檔，俾200円可以租碳爐，在市場內買了海鮮，自行燒烤，我認為咁樣最好、最有特式。
在市場中間有一大檔專賣吞拿魚，剛在表演解䏽整條吞拿魚，然後各個部份一份一份賣，果賣魚佬一邊切一邊似乎詳細講每個部份有乜咁正、點樣煮等。

白浜沿岸有幾個大海灘，仲有海洋公園，我都無去。

白浜海舟溫泉旅館

9月28日從京都坐火車經新大阪駅到白浜，入住温泉旅館「南紀白浜 浜千鳥の湯 海舟」 ，此酒店頗新，建於海邊，可遠眺太平洋。

我住的是洋室，即有牀，佢地有D和式屋仔，好近海崖邊，似乎好正，但好貴。
館內有男、女大浴場各一，免費貸切風呂三個，更有男女混浴風呂一個，全部戶外海景。混浴風呂有特別浴巾圍在身上的。

混浴風呂

貸切風呂

溫泉應該不是天然溫泉水，因為日本的天然溫泉都有官方証書掛在牆上。
我發現有日本男女，當下午三點溫泉一開門，便衝去攞貸切風呂鎖匙，而沒有先沖洗便去風呂個室，入便無得沖洗的，我後來在貸切風呂入面聞到一陣煙味並現發現一個剛熄的煙頭，唔知係咪事後煙，於是我要周圍睇下有無漬穢，日本人也並非一定有公德心！
佢地在大堂有個地方，放了各款和式浴衣（可以穿著到處行的果種），客人可以隨意攞番房換，我一日換兩套。

晚餐對住個全海景，睇住慢慢夜色四合，我猜這裏在冬天可以看到全蛋日落，正。溫泉旅館的食物都係好睇唔好食。
第一晚主菜是烤鮑魚（爽而無味）、和牛sukiyaki（D牛肉就好滑好淋）。

第二晚主菜是魚生船（典型好睇唔好食）、伊勢海老（完全不好吃）。

天氣真的好，出猛太陽，但有清涼海風，D風係無濕氣的，好爽。但旁晚開始好多一種綠色的飛蟲，不可打開窗，只能關窗開冷氣。
酒店晚上10點大堂有拉麵宵夜。

我相當滿意呢間溫泉旅館，服務不錯，reception 都能說簡單英語，海景極佳。

京星天婦羅

我每次到日本都最少去一次天婦羅專門店，今次訂了京都京星，9月27晚。該店是米芝蓮二星，就在之前一晚的おが和旁邊。小店只有只多十人的吧枱，由大廚主理，兩女侍應協助。
供應的都是大廚發辨的每日套餐，是晚總共吃了十六種天婦羅（包括不同時候個別上的炸蝦三隻。
東西是多兼有D創意，但大部分是預先準備好，然後個別炸成上桌，不及大部份名氣天婦羅店，由廚師在客面前剝蝦、切菜、攪粉醬等，是一場表演。

食物中白露筍、鮮露筍、連皮和鱗的炸魚、魷魚、鰻魚菇卷都好食，其他都一般，最特別是最後一道炸蕃薯，女侍應先拿來一碟啡啡地色的汁，說用來點炸蕃薯，原來果碟仔是拔蘭地，勁，點剩便飲埋。我以後也要以各種拔蘭地、威士忌等來點炸物喇。

最後的炸蝦餅泡飯也不錯。甜品是雪糕，也好。

總結，比東京近藤差了兩級，唔食唔係損失。

京都おが和Ogawa

今次到京都渡假，第一頓晚飯訂在祇園おが和，店很小，隱在小街內。大廚曾在著名的京料理店任職，自行開業時間不長，便拿到米芝蓮一星。
店內只有七個座位的吧台，大廚很年青，和其幫手都能講很簡單的英文，佢地有張英日對照的日文食材名，用來簡單地介紹每道菜給我聴。
第一道是冷盤，是蟹肉、加黑酢做的啫哩，最底下是一塊糕，蟹肉無乜味。

第二道是菇湯，不知是不是松茸，食唔到味道，湯內有鱧肉（像鱔的魚），勁鮮甜，仲有半粒梅，碗底有D粉絲。

第三道是魚生，只有兩種白身魚，較淡色個種唔係𩶘魚，我聽唔明係乜，但非常軟滑，師傅話點D wasabi和醋，果然好夾，較深色果隻魚生，配個汁、汁內有洋蔥粒和姜粒，個汁酸酸地，用嚟點腥的魚最啱。如果識話，我會同大廚講：唔該切多畢幾舊魚來點埋D汁，唔好浪費。
講開又講，魚生肯落本，就買到最靚的魚，只用最精選的一點部位，但高檔的魚生，師傅都精硏自家配的汁，以見高下。
。

第四道是拖羅手卷，大廚把拖羅切成粗條狀，上面揸D汁，與飯卷在紫菜內，魚肉唔肥，全靠個汁

第五道是燒類似鱔的魚，大廚即時用手機上網查翻譯，但只找到拉丁文的學名。魚起球去燒，其貌不揚，但燒得好好味，難以形容，後來仔細回味，果陣係煙薰味。

第六道是肉湯浸成條茄子，肉汁有味得很犀利，上給客前切成短段。

第七道是鮑魚，鮑魚肉好淋但無味，而且上面個獻有D腥。

之後瓦煲煲飯，可以配四種東西任揀一種：醃過的魚仔、醃過的菇仔、醃烏魚子。四種都唔啱我口味。

甜品好似一盤嘢乜都有D，但味道如夾，又各有口感。
總結，算幾好的改良會席料理，主廚和助手都年青而平易近人。


住所       京都府京都市東山区祇園町北側347-51 第一雅ビル 1F

Hokahoka ほかほか酒処

星期六晚突發約朋友吃日本菜喝清酒，揀了一間未幫趁過的銅鑼灣居酒屋，Hokahoka ほかほか酒処。
佢地D枱擺得唔密，唔錯。清酒的選擇很多，仲有張紙介紹酒味，什麼叫爽、薰等等。
我先叫D刺身，本來想食蠔、赤貝都無貨。刺身質素很好，牡丹蝦就麻麻。

之後叫串燒：牛舌、銀杏、鷄軟骨都一般，鷄肉串就很好。

總結：服務、食物都可以，適宜喝酒聊天。