skip to main |
skip to sidebar
這次趁出差到意大利，到佛羅倫斯渡假四天，可惜大部分時間天陰、下雨又很凍，影響了遊興。其實我以前已去過2次佛羅倫斯（應該是1996年和2005年），每次都印象良好，我最喜歡站在河邊，看水流和橋，至於買名牌就唔啱我。那些著名博物館長長人籠，入去看了一次就算。反而這次掽上一個文藝復興早期的佛羅倫斯藝術品展覽，從各地的博物館借來多個展品，頗為豐富和有教育性，更不用排隊和同人迫。
街上真的迫滿遊客，集中在Duomo附近和老橋，迫過銅鑼灣。但又不是太多強國人，而在中央巿場附近幾條小街都開咗中菜小食店、並有重慶火煱。
中央巿場可以一遊，除了魚、肉、蔬果，還有很多食材店，都很友善，有幾間仲有日女店員，並可安排宅急便，但只限送到日本。
很多我去的食店，也坐了很多意大利人，我提早2、3星期去訂一間米芝蓮三星餐廳也無位，可能經濟問題沒有影響到有錢人。
我想去一間很多好評的地道小餐廳 ，Vini e Vecchi Sapori ，可惜他們剛在休業裝修。
3月26日，在佛羅倫斯巿區逛街，本來想去 Ferragamo Museum 睇下，原來逢星期二休館。中午到位於 Via Tornabuoni 64號的 Procacci 小館吃簡單便食當午餐，跟很多名店一樣，此店也有日女侍應。我叫了一杯 Prosecco，(我已愛上此意大利白汽酒，和另一種 Lambrusco 紅汽酒)。二個白松露醬做的小麭，半份火腿和幾小片有松露的 Salami，好食。
食完去Palazzo Strozzi 看一過剛開始的文藝復興早期的佛羅倫斯藝術品，相當豐富。
3月26日，這次旅程的最後一天，到酒店附近的這間名店吃晚餐。我在門口經過幾次，看了門口貼的菜單好似很多地道的菜式，回酒店上網查下，原來名店來的，而且顧客（當然是遊客為主）口碑頗佳，所以叫酒店打電話替我留座。
入內後，一眾侍應都很親切，負責我張枱的肥佬伙記知我係香港人，還找來中意文雙語的菜單，其中的中文翻譯就已經令人很開心：Antipasti 叫「首發」、Taglierini Freschi Al Trutufo 「新鮮跳過麵條用醬和新鮮松露」、 Secondi Piatti 叫做「主要課程」。大慨有強國人以翻譯「乾炒牛河」方法替此店老翻，很可惜忘記向他們攞一張中意餐單留念。
頭盤我叫4件Cristini 即多士上放肉醬類的小食，此四件為兩種肝醬、一塊塗了黑色的醬，侍應說是醃咸的olive 碎、和一塊塗了蕃茄粒，全部好食，很啱餸紅酒。
主菜就叫一人份的 Florentine T-Bone Steak, 一場嚟到佛羅倫斯點都要食呢塊巨型牛扒。面燒得香脆，入面頗生，都算好食，但太多筋，尤其近骨的地方，很難切、很難趙。我點了一份雜菜， Fritto Di Verdure上桌原來是雜菜天婦羅。
食得好飽，無法再食佢地的「從推車上甜食」。
總結，地道食物，頗對遊客口味，ok。
3月25日睌，到呢間在佛羅倫斯火車站附近的海鮮餐廳吃晚餐，其意大利名稱是「4個朋友」的意思，大慨是4個朋友夾份開的。進門見裝修就知是走摩登高檔路線，近門口有一過小冰櫃放了冰鮮海鮮，但看樣子已經雪咗好耐。他們有一個 private dining 的小廳，四面是酒櫃，天花有仿古畫。
我叫了一個魚生頭盤，各種份量和質素都比 Flor D'Acqua 差一、兩皮，scampi和魚生 全無味道，兩隻生蠔還可以。
第一道主菜，我叫了一個「四個朋友的意粉」，大慨是本店特別菜式，上桌真係有海鮮香味，有 N 種海鮮配料，有幾塊魷魚肉特別嫩滑，但D蜆和貝類就多沙，我在意大利吃海鮮意粉都有這個通病，大慨本地人唔介意，寧願原汁原味，洗得耐鮮味、海水味無味。個碟面睇嚟好細，實際上好深，所以份量不少，才賣十幾歐羅，算超值。
第二道主菜是煎龍脷，條魚加了芡，再由侍應在你面前起出四條肉，一睇就知熟過籠，肉也大慨雪了太久，不好吃。
總結：除了海鮮意粉，其他兩道菜都不佳，比 Flor D'Acqua 差很多。 I Quattro amici
Via Degli Orti oricellari 29
3月24日晚到這間地道 Florence 餐廳吃晚餐，我在2005年嚟過，印象很深。我在計劃這次行程時，找出一本舊的Florence 旅遊書，竟然在裏面夾住一張2005年在Il Latini 吃餐果張單！近年此店被米芝蓮給與車軚人底食推介。
我訂了七點半，去到門口，竟然人山人海，原來有一大團美國遊客，起碼50人在門口，到佢地入哂去才到其他訂咗位的客，其實百份之九十係遊客，到九點半第二輪，才有意大利人。
我叫一個 mixed starter，有火腿、香腸、鷄肝多士、好似薏米的粒粒做的沙律等，桌上仍然放了一枝自家品牌的 table wine，客人可以隨便自己倒來飲。
主菜我想叫牛肚，但侍應話無，叫 mixed pasta，佢話好大份是幾個人 share 的，咁我求其叫個燒牛肉（因為 steak florentine 真的太大份），舊牛肉又幾嫩、幾juicy喎。
甜品我叫一個朱古力餅，很普通，然後送來一碟地道小餅，點dessert wine 來吃。
這次太多遊客，亦無上次咁，頭盤不斷咁上，到我食飽想埋單，伙記才問我主菜想食乜！以前亦無餐牌的，這次叫做有兩頁紙意大利文的餐牌。
希望意大利人不會因為唔憂無生意而水準下降啦。
3月24日，參加了由佛羅倫斯出發，到Cinque Terre 一日遊，Cinque Terre 可解作五個土地，這裡是指五條鄉村，以前知道這五條海邊鄉村，風景靚，原來已被列入世界自然遺產。村與村之間有小山路，全程約要行九小時，自由行可以分兩日，住於其中一條村。可惜當天天陰有小雨，又大風又凍，也影不到靚相，有點掃興。
行程是先經過海港城市 La Spezia ，從港灣可以遠眺亞爾卑斯山，山後應是瑞士。
Riomaggiore :
Manarola 和Corniglia之間緣海邊的步行路據說風景最美，稱為 lovers road，有很多情侶共遊，並把寫有雙方名字的鎖頭，鎖在鐵欄上，表示情永固，好有意思。可惜去年多場大雨，山上沙石衝下來損毀了步行路，目前封路維修，只有最初百幾米可以行。
Vernazza :
行程最後到另一海邊漂亮小鎮 Porto Venere。
今日（3月23日）開始到 Florence 放假幾日，早排朋友介紹這間佛羅倫斯的海鮮餐廳，今晚就去食。
我從河邊按地圖步行前往，Via Pisana 37號，呢條街D霖吧亂的，1號、3號之後突然40幾號，我一直行一直看，行到下一條街都搵唔到，唯有用手機打電話去問，頂，原來37號在11號和13號之間。
入門口有一枱放滿當日海鮮，頗多蟹和大大小小們龍蝦。
侍應話呢度雖然有菜單，但D客都係吃當日海鮮，佢向我介紹了幾樣，我話好，我以為除了頭盤和意粉之外，其他他說的是幾種海鮮煑埋一碟，點知原來係每樣一度菜。
麵包幾特別，有油炸鬼 feel。
頭盤係六種魚生，當然係意大利式造法，最特別係生的scampi 畧用olive oil 醃下，生食都係第一次，肉幾鮮味、膏也夠味，其他的白身魚（應係魚）也好食，昋拿就一般。
距住係一舊醃咸的魚，肉質似鰻魚，下面是某種菜打成的蓉，無乜味。
跟住三隻熟中蝦，蝦身 meet 咗壳，頭就完整，想唔到隻蝦係點煑熟，若燒的個又全沒有蕉，但如果白灼蝦D肉係咪可以爽和軟兼備？頭入面有D膏，正。香港食到的都是箕圍蝦，呢D都係冰鮮海蝦，鬼佬沒話活蝦送到巿場、食店的，但呢幾隻冰鮮蝦都已經好食。
跟住係一舊 turbot ，煑過籠，呢味係全晚最差。
然後係龍蝦麫，隻蝦開兩邊，算好肉而幾好食，麫也爽和但牙，但真係已經好飽，食剩三分一。
然後甜品係一杯 lemon sorbet，幾好味，唔會又酸又凍、食到牙都痺埋。
卒之要埋單啦，我正盤算要俾佢地作幾多，侍應話呢個套餐包酒水（我飲咗三杯酒和一枝水），才盛惠90歐羅，比我想像中平。
總結，相當不錯，以食物質量計，90歐羅不貴了，服務也好。星期六睌全滿，而且都是意大利人，應該係地道海鮮店。
地址：Via Pisana, 37/R, (記住係11號和13號門牌之間）
http://www.fuordacqua.it/?lang=en&page=home
