胸圍與胸襟

網上流傳了這些好句：
「胸口摸得着的尺寸叫胸圍，摸不到的叫胸襟。

嘴裏說出來的話叫內容，說不出來的叫內涵。
手上比劃出來的動作叫手勢，比劃不出來的叫手段。
耳朵聽到的是聲音，聽不到的是聲譽。
白紙黑字印出來的是文憑，印不出來的叫文化。
選票多少中看得見的換屆叫選舉，看不見的叫冊封。
看得見的自大表情叫傲氣，看不見的自尊底線叫傲骨。」

穴藏

之前在報紙看到呢間在中環的穴藏有北海道毛蟹食，1月24日晩與朋友去試下。

訂位時訂定一隻北海道毛蟹，坐下後每人叫一個廚師發辨刺身，然後才吃蒸熟的毛蟹凍食。


刺身順序有：活蝦切幼條上放魚子醬、厚切白身魚、鯛肉卷（好味）、貝肉（上面刨左D柚子皮，超爽超好味）、金目鯛（面畧燒）、紅蝦肉上面放滿蝦膏（頂好味）、燒帶子用紫菜夾住食。

師傅將蟹身切得方便吃、腳拆肉，肉味並不特別好（可能前面魚生太正），蟹蓋就好多膏兼好味，好過哂近年食到的大閘蟹膏。

跟住係醬肉蘿蔔，普通。

跟著加三款壽司：漬過的中拖羅，燒過的某種魚，超肥又淋拖羅，全部好好味。

之後又加了蝦膏天婦羅、海膽天婦羅，一流。

記憶中，這餐是在香港食過最豪最好味的日本海鮮，招呼很好，有點太熱情，經理和幾位師傅多次來聊天和敬酒、回敬等。卒之帶著滿肚清酒和膽固醇回家。

Restaurant Martin, Shanghai, by Martin Berasategui

1月9日出差到上海，咁啱有朋友也在上海，所以約埋食嘢，卒之揀了呢間Restaurant Martin 西班牙餐廳，其主理人Martin Berasategui 在西班牙的餐廳拿了米芝蓮三星，在歐洲各地也有分店，近年來了上海開店，地址在徐家滙公園旁的一間近百年歷史的三層獨立屋內，很有特式，內裏裝修也典雅。

本來在他們網頁見到我很想試的套餐，但訂位時佢地話網頁裏的餐單很久已沒更新，他們電郵了最新的 menu 給我，套餐卻唔啱我地口味，卒之都係叫 a la carte，最特別係佢地的 wine list 頗豐富，有大量西班牙酒可選，也有很多過萬元一枝的法國名酒。我地揀了一枝Agustí Torelló Mata Rosat Trepat玫瑰紅汽酒和一枝Monastel紅酒（即係 Rhone 的Mourvèdre），都很好，很易配食物。佢地有種像 Grissini 的麫包條，好好好食。

Amuse bouche 是一舊沙甸魚，麻麻。

我地叫幾個菜來 share，第一個 cold cut platter ，三種西班牙腸和三種芝士都普通，火腿唔係黑毛腿24、36個月果種，而係一般的咸火腿，很失望，或者我地無問清楚，係乜火腿，或應指明要黑毛豬風乾火腿。

第二道菜是豬肉，中間夾了紅椒做的醬，幾特別，豬肉嫩但無乜味。

跟著係龍蝦露筍，用很多功夫堆砌的一道菜，龍蝦肉只有小小的幾片，反而有很大片很香的白松露。

跟著係燒紅蝦，蝦肉無味，蝦頭的膏就好多好夠味。

甜品普通。

總結，裝修、服務都很好，但食物未算好，無特別。

皇仁舊生會中菜廳

繼上次增煇藝廚美食會之後，組織者再安排一月八日在皇仁舊生會中菜廳吃晚餐兼嚐美酒。

今次十二人，共嚐三枝白酒、七枝紅酒。最正係2005年的 St. Julien ，有位朋友帶來一枝日本信州紅酒，幾特別。

第一味是糖桂花餞美國桶蠔，配以 Alsace 偏甜的Gewürztraminer白酒，超正。

第二味是蟹黃扒豆腐豆苗，蟹黃份量好勁，但味並不濃。

跟著係杏仁白肺湯，好濃，應該燉咗好足時間，正。

柚皮炆鵝掌，柚皮和鵝掌都無乜味，呢道菜稍差。

椒鹽蝦、油泡班球和羊腩煲，都係普普通通。

炸子鷄，皮很脆，肉偏乾，我感覺好似係剛用焗爐翻熱。最後這幾味菜雖然沒有特別，但餸酒又幾好。

總結，聽說很難訂位，價錢不貴，招呼也好，但煑功跟增煇藝廚比較，就稍次一級。

家常便飯

最近常去謝菲道的家常便飯吃午飯，佢地周一至周五的一般午餐包湯、一個餸（有三、四款可選）、一碗飯（可選紅米）、糖水，才45元，無加一，加碟油菜15元。個餸多數係蒸魚蒸鷄、蒸肉餅，近期一、三、五有煲仔飯！也些日子有個餐有炒粉麪可選。

質量比住家菜好得多，只是有點唔就腳，搭兩蚊叮叮去食都底。

湖舟 新店

看雜誌知道湖舟剛搬咗去崇光傍的逸園中心18樓，1月3日約了朋友往吃午餐試下。入門有一陣魚腥味，唔係幾舒服。

佢地午餐套餐大慨有十種，最平的收$220，我和朋友都選了一個鰻魚飯的特別套餐，收$380一位，慨然係2013年頭炮，不妨豪一下。

一盤食物上桌，前面三格，從左起是超正刺身，有大拖羅、帶子，中間是菜沙律，有D fusion 啫哩，右邊是有咸有甜的小食，呢格麻麻。


鰻魚和飯都好，鰻魚據說是該店直接從日本入口。

蒸蛋也很多料。湯濃而裡面有舊日式年糕。

總結，貴但食物仍有高水準。

New Year Resolution 2013

2012 的目標全部做唔到，今年嚟過：

1. 控制支出，儲蓄及投資月入的三分之一。

2. 控制體重，一定要減一吋腰圍。

3. 再去京都。

4. 每月看一本書。 全年最少睇四本 social science, investment, 的書。