Tate Dining Room & Bar

一直想去呢間大人氣法國餐小店，據說主理的女士在法國學廚，回香港開店供應新派法國菜，不久便長期爆滿，一年光境便拿下米芝蓮一星。
店子不大，大慨最多坐約廿零人，每晚供應兩種 menu，一個六道菜，一個九道菜，並可配 wine pairing，最好嘢係兩種 menu的菜式大部份不同。
我與朋友叫哂兩種 menu，共享十五道菜！
食咁多道菜，無法記得哂，侍應簡介很細聲，我也聽唔清。縂之全部好睇好食，唔係亞茂整餅。煑法是法式但沒有多用好 creamy 的sauce，有一個栗子做的肉羹用日式漆器碗上，像吃日本京料理。另有一個pasta，應該係用蝦肉和殼煑成濃湯，非常好味，意粉上面舖咗D脆的炸物，又係好味。

食完甜品，petit four 放在一個車仔模型上，仍然是成車餅仔。

總結：名不虛傳，食物配襯、煑功、美感都一流，應該是香港五星酒店之外的最佳新派法菜，而且取價合理。Amber 和 Caprice仍在環境、食材、招呼等高一、兩級。

純和牛燒肉

10月19日晚與朋友到銅鑼灣食廈享利中心的新店「純和牛燒肉」，吃日式燒烤牛肉。
這新店名乎其實，主打牛肉，各式牛肉豐儉由人。但明顯侍應不足，由一位廚師在吧台後切肉，有些還磅過，才放上碟由侍應送到客人桌上。

我們叫了多種牛肉，名字都唔記得咁多，有好食也有太油的，食唔晒。

最幣係見佢地有鋁罐裝的 Sparkling Sake，我叫了一瓶，難以形容地難喝！

總結，只能說可以接受。

爽報副刊之公關

昨日的爽報原來係初終版，其實爽報真係差，副刊也越來越走下坡，免費報紙絕對係以副刊為賣點，AM730依然不錯。

昨天看爽報副刊，偶然見靚女熊黛林的文，果篇叫「金牌公關」的專欄，前幾段也沒什麼，最後幾句嚇死。翻譯出來便是：姐姐，你因姦成孕，已成事實，何不樂觀面對？

唉，公關。

目利きの銀次

昨日中午到新開的「目利きの銀次」吃午餐，該店開在世貿中心五樓， Hooray 樓上，以前好似係一間鐵板燒。此店標榜沖繩料理，似居酒屋。

入座後看菜單，原來佢地沒有午餐 set，只能逐樣叫，咁我一個人幾難，叫一樣太少叫兩樣可能太多。然後又發現佢地無免費荼，各飲料（包括茶）50元起！卒之可以俾杯好滾的滾水我，我的初步印象自然不佳。

我叫一碟六串串燒（$118）和鴨肉烏冬（$98），都是該店推薦強項食物。

鴨肉烏冬先來，凍烏冬和鴨肉放在淺筲箕上，另有一碗熱湯，可以夾D烏冬入湯內浸熱才吃，原來湯內也有兩片鴨肉。唔知係D麪定湯撈咗少少柚子汁或皮，突然食到點點柚子味，好食兼勾起最近京都遊。味道和賣相俱佳，烏冬的口感最啱我心水，只是鴨肉有D蘇。

跟著來串燒，右起鷄翼，上面好似淋咗油咁，肉就好味。鷄肉棒，肉淋而非常好味，入面有D類似蔥碎的物質，印象中好少食過咁好味的鷄肉棒。豬肉串普通。
鷄軟骨，有D凍咗。
鷄脾肉，非常好味。
煙肉卷小蕃茄，好味。

總結，作為午餐太貴但好味，三數知己飲食應該幾好。

ALBA

10月8日與同事去銅鑼灣高級食廈, Cubus 10樓的ALBA吃午餐。
這間意大利餐廳，裝修雅潔，午餐的頭盤可以選自助 tapas bar, 或湯，當然係食各款 tapas喇，選擇頗多火腿麻麻，其他都好食，尤其幾款用匙更仔放的小食。

主菜有五、六種，價錢不同，我叫燒鷄，不錯皮脆但肉不夠 juicy。同事叫 Risoto 據說好味。

餐有甜品、咖啡、茶，仲有 petite four！餐約百幾二百蚊，但比 Habitu好食和抵食。

京都後補

去過日本都試過喷水坐廁，今次試了個應是新產品，除了噴水，還會吹熱風，幫你吹番乾！

在錦市場一檔賣松茸的，用中文敬告強國人。

在午飯時間的一蘭，無乜人幫趁。

藝妓的背影:

京都和泉屋町

今次旅程最特別的新體驗，是在9月30晚，住於「和泉町屋」。
這是由一家旅舍管理的獨立屋，有幾家在京都不同地點，這家和泉町屋位置最佳，正門在木屋町通，面臨鴨川。步行5分鐘便是四条、河原町，10分鐘便到祇園心臟地帶。
和泉町屋附近高瀨川和木屋町通也有很多小料理店和酒館，看來很有特色。而過了河原町便是先斗町食街。
屋內有兩層，樓下是客廳，可以改放日式床鋪睡2至3人，有小廁和浴室。樓上一間大睡房，小睡房，小廳（也可以放日式床鋪），浴室、廁所。屋內不可煑食，可以最多住6人。一個人住有D孤獨，我從未住過獨立屋何況一個人住，剩係行上行落、開燈關燈都好忙。
如果幾個熟朋友一同旅行，住町屋係唔錯選擇。

ここら屋 先斗町店

10月3日晚，到先斗町一帶覓食，希望食D唔係京料理的地道食物，又要避開強國人，見一開在橫巷內的居酒屋    ここら屋  ，客人坐地蓆和婑桌，菜單只一張寫滿日文和小量漢字的紙，幾有特式，便走入去，侍應都是年青人會一點英文，但不會用英文解說食物，我便憑漢字和簡單日文字去點菜。

首先點了清酒，佢地逐杯賣，侍應拿杯和小碟來，杯放碟上，從一升大玻璃樽倒酒入杯，致滿瀉到碟內直到碟也瀉。

先叫一客三款魚生，但魚生名都是日文，只好亂指三款，竟然有板有眼，一款白身魚（好肥好滑）、拖羅和一款醃過的腥腥地魚，好開心。


跟著叫熱食，豆腐鍋，份量好似好大，原來豆腐只切一 cm厚上面有D泡沫物事， ok 好食。


燒地鷄和䓤煑物，好香好味。



意尤未盡，再叫蛸（八爪魚），原來係 wasabi 涼伴八爪魚，八爪魚肉和蘇切小粒，好爽好好味。



最後叫松茸茶碗蒸，湯幾好飲但松茸無味。



當晚有一班年青人為朋友慶祝生日，氣氛熱烈。

又係食得好滿意的一餐，從門外觀察而入去食，能乎合我的預期，好開心。

京都二日遊記

整個旅遊行程，留了最後二整天，早上看景點，下午行街。

這幾日住在東山的 Westin Miyako，是一個月前在 一休.com 見有特價而馬上預訂，如果唔係，房租都會幾金。
東山的樹林茂密，可以預計深秋時整個山都是紅葉，一定好靚。

10月2日早上先到清水寺外二年坂、三年坂、寧寧之路、石塀小路等，沿途除了看景，也看清水燒、陶器品店，D嘢好靚，但好難攞番香港。

這幾天見到好多日本中學生修學旅行。

下午到小街三條通，好多特色小店，有國際品牌，也有本國 designers 專店，尤其有幾家賣袋包，design和用料、手工都靚，寫明日本造。

10月3日，此次旅行的最後一天（4號早機返香港），今早天陰有微微雨，本來計劃好今早去行哲學之路及周邊，天陰更好，不會曬死。路上其實無乜風景，沿著小川而行也很舒適，若然在櫻花盛放和滿山紅葉，一定很美。

中午前到新京極一帶覓食，發現蟹店道樂京都店，雖然去年在大阪道頓堀總店食過，一場嚟到、相請不如偶遇，入去食番過蟹套餐，其實得個樣，蟹無蟹味，可能午市套餐較平，將貨就價。
午餐後,沿寺町通向北，二條通、夷川通一帶逛街，很多老店，尤其木傢俱和古玩店，更多納納雜雜的雜貨店，好多係特別但唔等使，像一家店門口擺咗隻鐵豬，入面有賣傢俱、小擺設、舊書等等，可能店主想起要賣就擺出來，自己過癮。



今次在香港租咗個 wifi egg，每日收80港元，可以無限上網（其實每日超過500MB便會減速，可以俾5部機同時用。在街上要搵路方便D，坐下休息也可用手機上網。但著咗部機，個舊電好熱，唔敢長期開