共產黨愛菲律賓

果件菲律賓總統賴傳媒直播，導致救人質失敗。佢諗住學香港中联办個九品芝麻官「確跌穿」嘅講話：〝在發生社會危機時，傳媒應協助政府…〞，堂堂一国總統竟借一個小小黨官嘅話來推卸责任。
其實共產黨真係好鍾意菲律賓嘅，因為佢地是民主的反面教材。〝你地香港人咁鍾意民主，顧住D港女要去外國做港妹、港傭呀。 〞

緊急呼籲

我希望D香港傳媒、記者，當康泰遇难者和他們的家人回港後，不要纏住佢地追訪，俾D空間、時間讓他們平服，面對未來的生活。
香港記者一向最叻向死者家屬問：你心情點呀？你傷唔傷心呀？真係too simple，sometimes 那衣褲！

今日電視放影個14歲少女喪失父母，自己趟在医院裏，大慨未知父母逢不測，對記者話〝很想快D揾番 Daddy mammy…〞，個記者想點呀？係咪〝制做〞新聞呀？

南亞餐廳

8月18日中午到南亞餐廳吃海南鷄飯，要鷄脾，$70一客。

鷄肉幾滑，一碟仔薑蓉，一碟仔酸汁，我都不用的，有D地方標榜正宗，配一碟黑媽媽豉油，這裡沒有豉油，我認為鷄好食就得，無需加呢加路。個湯一般，杯飯就真係加鷄湯或鷄油煑，好好味。

呢份海南鷄飯仲包一杯金牌紅荳冰，果D紅荳一粒粒，D冰係刨冰，好懷舊好好食。很多茶餐廳依家衹係落D紅荳加糖水、冰塊和奶，好難食。

呢度服務良好，味道、價錢合理。

申請睇英超

早排有很多人討論到仇富呢個話題，其實都係在日常生活裡，俾大財團漁肉，谷住度氣。

Now 和有線輪住以高價投得英超獨家播權，然後以高價長期合約綑綁客户，收費电視魚肉球迷便是一例。以下係我親身經歴。

2、3星期前我老豆話新一季英超在有線301-306台播，但按到果D台号話我地無訂購喎！吓？我唔係在訂睇世界杯時一併訂埋英超咩？

果晚我回自己住所也試吓按到301等台，又係話我地無訂購。我便按佢地廣告中的申請熱線，打去 “申請” ，按咗一輪1, 2,3,4,5….之後有位小姐接聽，佢話我之前只係訂世界杯套餐，無包英超，英超係另一套餐，講咗一輪我堅持之前我訂世界杯套餐個聽電話的小姐係話包英超，呢位小姐堅持 “..唔會包英超，因為個電腦裡便我個户口無英超，佢無握我…”。咁即係之前個小姐握我啦，佢仲話個電腦紀錄因為訂世界杯套餐，送咗個燙斗俾我，我係去攞咗個燙斗 (雖然我一直唔明送個燙斗俾球迷有乜用？)，但唔表示我收咗個燙斗來交換無得睇英超。
跟住佢話問主管，幾分鐘後佢話主管話因為我係長期客户，所以可以每月$$$特價簽24個月合約，包依家睇緊嘅台並包英超，而且為咗答謝(其實玩謝緊)我呢個長期客，免2個月月費(唔知第幾第幾個月免收，其實早排訂世界杯套餐俾佢綑綁18定24月也是說免2個月，上次免果2個月好似仍未享受喎)。咁我話小姐我攪唔清啦，你坦白D講即係幾多啦，咁佢話平均每個月即係277蚊啫，你依家都俾緊259蚊喇。唉，我記得2年前因為有線無咗英超所以cut咗體育台套餐，應該係每月130蚊咋。

卒之我投降，以277蚊一個月，成功申請了睇英超。申請過程用咗半個鐘，死咗好多細胞，加上一肚氣，慘過申請綜緩。

我還好，英超開波前己經被魚肉了，很多人到8月14号晚坐定定等睇波才發現無得睇。

麗姐私房菜

8月17日與3同事第一次到麗姐私房菜吃午市套餐，每個餸$55，包飯和湯，湯每日有兩款，我地都係叫豬肺湯，普普通通。
餸菜都係家庭式，主要係蒸的，炒的餸就很細碟，但比住家菜好食，而且無咁多油。飯是用小盅蒸，软硬度剛剛啱我。
佢地菜單有很多小菜和碟頭飯，仲有粥。佢地仲有很多南洋食品、棷青、新界蝦醬等出售。
我地坐下之後，聽到個女伙記收到兩個客來電查詢「今日有無做咖哩牛腩？」，個女伙記話老闆娘好拿手做咖哩，但最近老闆娘忙於在跑馬地開新的西餐廳，唔得閒做，D熟客會打嚟問今日有無咖哩，有就要留。
此店服務算良好，但位置唔易找。我地覺得比住家菜好得多，會多D嚟。下次記得問吓有乜私房菜。
電話:28827300，地址：禮頓道62号A(禮賢大厦)地下

燒鴨油

早幾日睇电視新聞，講大陸有人專收燒臘檔舖的燒鴨油，去加工轉售做食用油，尤其係用嚟做麻辣火煱。比起前排D坑渠油，呢單係小兒科。
我睇果段片，反而覺得D燒鴨最唔正常，唔知係乜嘢做出嚟嘅怪物。

Brunch Club

今天中午到銅鑼灣禮頓道的 Brunch Club吃午餐，以前都嚟過幾次， 佢地的set lunch 都係一百元以下。

今次我叫了一個豬耳沙律，我都係第一次在西餐中吃豬耳，幾特別。主菜叫Rib Eye Steak，舊牛扒好多根，有D唔似牛肉嘅味，唔好食，呢個set $88 +10%。

果處環境本來清靜，服務也ok，但今日D嘢唔好食，仲有一台大約8、9個人，極之嘈吵，想靜靜地飲咖啡看埋張報紙都無心情。

D17

8月13日，黑色星期五，無乜大件事，與2同事往逸園中心5樓的D17吃午餐，早排都嚟過兩次，覺得 set lunch 物有所值，座位舒適、又比較清靜。
佢地D方飽， “Hong”得畧脆，查小小監欖油，好味。
今次我們都係叫意粉main course ($48)，加$20有 appetiser，今天係鴨肝，幾正。

我叫辣蜆肉意粉，D蜆肉有D腥。佢地的海鮮意粉不錯。

佢地 set lunch 都有生蠔的套餐，以後想豪吓嘅，可以嚟食蠔做午餐。

地產妖魔

陳雲在8月10日信報，題為〝港財閥請「地獄式捐獻」 〞的妙文，借Bill Gates和 Warren Buffet叫大財主捐出自家做善事，討論香港地產妖魔，真係拳拳到肉。


++++++++++++++++++++++++++++++++++++++++++++++++++++++++++++++
〝港財閥請「地獄式捐獻」 〞

前幾年，凡是聽見香港地產財閥想在香港做些什麼善事或搞什麼項目回饋社會之類的，都不期然笑起來，太好笑了。肉食商人猛然回頭，鼓吹素食，教市民認識現代農場肉食之毒，苦勸市民盡量減少食肉；妓院老闆心血來潮，發起全城守貞宣誓大行動，都不及地產財閥要在香港行善來得好笑。我就是怕了笑壞自己，這幾年都忍住手，沒評論這些趣事。
上周，美國富豪有捐身家的行動呼籲，沸沸揚揚，香港也好像有些地產財閥要躍躍欲試，提高格調行善，紓解一下社會的仇富心理，為「地產霸權」之論消消氣。念及此文刊登之日，正是陰曆七月初一，中國風俗認為此日鬼門大開，不妨當是白日見鬼，以靈異角度來評論。

菩薩畏因，凡人畏果
肉商勸人食素，妓院老闆勸人守貞，也會是出於真誠和善心的，你我也許都見過這類思想矛盾、但心地善良的好人。矛盾是有的，但不怎麼大。總有人要食肉，也總有人要嫖妓，肉商或妓院收手也沒用，總有人會賣肉和賣淫的。肉商在行善的時候，可以選購合乎規格的安全肉食，屠宰盡量人道，肉檔準備少份量的包裝，歡迎顧客買少份量，鼓勵人家少肉多菜。
妓院在行善時，可以人道對待娼妓和嫖客，光顧過於頻繁的，勸他發展其他嗜好，照顧家庭，有鬱結或沉溺的，便要勸他看心理醫生。
行善首先要止惡和懺悔。在自己職分之內，不做惡業，停止惡因。做了惡業，就要懺悔，正如上述的肉商和妓院的例子。香港的地產財閥惡貫滿盈，惡業正在增加，行什麼善呢？至於懺悔，市民都未曾看見有地產財閥懺悔自己傷天害理的。振振有詞，嫌自己賺得少的，或投訴政府不賣力配合其賺錢大計的，埋怨政府未曾極力鎮壓保育人士的，就聽得多。
地產財閥之中，很有一些是信佛信道的，我既是修行人，也趁七月一日之機，向惡道眾生說一下法。昔時梁武帝，一生造寺無數，布施供養僧眾，求教於達摩祖師，祖師說他並無功德，以其心不淨也。
即使是善業之人，修功德，也先要心淨，但求濟人度人，不求福報，不求名號，甚至連濟人度人的色相都要脫去。若是惡業之人，先要止惡，後要懺悔，始可以談布施，談功德。
要在「因」上面用功，不是在「果」上面用功。種善因，才有善果。種的惡因多，即使有些少善業，也是於事無補，來世恐怕也要下地獄。今生結了善緣的，在地獄也可隨地藏菩薩修道。

傷殺性靈，甚於殺生
地產財閥之罪惡，可謂滔天。善業之中，放生最大；惡業之中，殺業最大。殺業之中，以傷殺性靈為最大。將人愚弄驅策，使其過勞工作而不給予合理報酬，又以地產炒賣壓榨其所得，也業務壟斷消滅其謀生門路，使其供少數大僱主集團虐待而不懂得抗爭，再收買高官，杜啞傳媒，蒙蔽學校，摧折正氣，使全城之人如行屍走肉，精神流離失所，比鬼魂中陰身，還要無知無覺，是謂傷殺性靈。殺靈之罪，甚於殺生。
殺業之中，殺未生之罪，為次大。所謂未生，是將來的眾生。將人心敗壞，以樓房為私業之念，破壞鄉郊水土，令這一代人無法接觸自然，令下一代人無法享有水土之利，令諸種生物絕命而無法繁衍，是殺未生之罪。第二個殺未生之罪，是妨礙民主發展。
民主是國家發展與國際和平之基礎，地產財閥盤踞立法會功能組別，不主動撤出，甚至不自制權力而向所有決議投棄權票，就是妨礙香港民主。
香港沒有民主，民意無法伸張，民怨無法宣洩，社會創造力和活力無法提升，遇有動盪，必會暴亂死人。即使局面粗安，社會也暮氣沉沉，猶如地獄之城，也是傷殺性靈。再者，香港不能示範民主，大陸之民主轉型也不會順利，間接也令大陸添了暴亂死人之機會。
古之君子有云：「吾雖不殺伯仁，伯仁由我而死。」雖然功能組別由港英設立，回歸之後由中共保留，但財閥不主動放棄或抵制，也是共謀。日後之動亂災難，死傷無數，這筆賬人民不能算，閻羅王也會算的。以上是悔罪。如果讀者之中有財閥或與彼等相關之人讀到，而絲毫不感到罪疚的，我也無所謂，日後地藏菩薩自會親身說法。

放下屠刀，立地成佛
所謂止惡，是惡業無法一下終止，但盡力行善，減少惡業。地產財閥富得漏油，大可放權讓利，毋須絲毫盡取。
樓房買賣可以實價實惠，商舖租賃不必苛刻，壓榨租戶，商場更不應與名下生意聯營壟斷，以非業務競爭的方法來趕絕同行。商場不宜過分規管監視，令人失去生趣。凡此惡業，不一一述之，免得諸位生惡心。
財閥如不懺悔，也不止惡，卻要立心要捐獻，也有一項目，適合他們大破慳囊，作其「地獄式捐獻」的，就是在全港十八區興建地藏菩薩寺，或者興建一座宏偉莊嚴的地藏殿也可以。
捐款布施，要對機，既然香港已被地產財閥弄得如人間地獄，捐醫院、辦教育，教創業都不對題，建地藏寺最實際。結下善緣，既是利人，也是利己。
香港人的生活在地產商掌握之內，連鐵路公司都是地產商。地產財閥營生眾多，又愛聯營業務，就剩下棺材店和殯儀館不敢沾手。興建地藏寺，順便經營公益性質的骨灰龕，香港人就由生到死都在地產商手裏，就功德圓滿了。

松島

銅鑼灣午餐第3篇，仍是日本餐。

8月11日與3同事到逸園中心(以前叫恆和鑽石大厦) 15樓的松島，我都好耐未嚟過喇。好彩早一天訂位，今天滿座。

我叫自選壽司set ($160)，可從一張壽司單中自選8件，再加手卷一份。我叫的8件壽司包括大拖羅、中拖羅、墨魚、赤貝、海胆等，全部都不錯，個青瓜卷除了青瓜脆，裡便重審D芝麻，好認真好好味。

3位同事都叫刺身定食，看來普通，但佢地都好鍾意件蛋上面烙咗「松島」二字。食品賣相仍是湖舟畧勝。

午餐定食包雪樣糕或咖啡茶。

呢度都係可以多D嚟。

湖舟

今日中午與朋友往湖舟食lunch。見到老闆袖山在此坐鎮，(回來在Openrice查一吓原來间Sodeyama己結業) ，此日沒有滿座，午市魚生套餐、壽司套餐、麫套餐的選擇多咗也貴咗，最平要$150，大部份$200。

我以前在Sodeyama食過蟹肉套餐，一直念念念不忘，今次叫了一過有蟹肉、雲丹和碎吞拿魚腩的魚生饭套餐 (本來個 set有三文魚子我唔食魚子改了碎吞拿魚腩) 。蟹肉味不濃，海胆就正囉，吞拿魚腩o.k. 啦，呢個 Set 盛惠$200。

朋友叫了魚生定食 ($180) ，賣相好，可惜個蝦頭很深色。

呢度除了食材好，一向碟中的擺設、賣相都上等。

Aux Beaux Art

7月31日晚與朋友們去美高梅的 Aux Beaux Art，本來我想去吃seafood platter 的，可惜整天腸胃不適，我只能看着他們吃。佢地叫咗個有龍虾的 seafood platter，不過隻龍虾查咗沙律酱、好娘，也不見得好食。

我自己叫了一份鮮露笋，普通，一碟通粉，好似很多芝士 (我叫咗唔好落芝士)，好似risotto咁，我唔鐘意。

佢地叫咗一客海鮮湯 Bouillabaisse ，好濃好味，一客煎鱸魚 ，份量少。

Waitress 話佢地逢星期四晚都有海鮮任食，每位MOP390，不妨一試。

仲有，呢度個面包皮脆肉軟，次次都食到唔停口。

At Corner 午餐

我每週總有1、2次，與朋友或同事在銅鑼灣吃不錯的午餐， 我準備把呢D不錯的午餐記錄下來。
8月6日與兩事到世貿的 At Corner 吃午餐，這間米芝蓮推薦的摩登日本餐廳，午餐定食有很多選擇，加5元可以吃自助沙律吧，這次沙律品種麻麻，最初佢地只係加收1蚊時沙律仲好D。

我叫了鰻魚飯定食 ($98)，燒得幾好味，佢地定食的湯是魚湯，我覺得幾「聲」。 一個同事叫七味燒牛肉豆腐鍋飯 ($68)，看來平平。另一同事叫的角切魚生飯 ($88)就靚好多，裡面有多種魚生粒。

定食包一甜品，或加錢有咖啡、茶。當日甜品係一小杯法式燉蛋，好好味。以咁嘅品質、價錢加靚海景，不妨多來。

Aurora, Macau

7月31日星期六中午與幾個朋友到氹仔的金濠鋒酒店 Aurora吃意大利餐，這間米芝蓮推薦的餐廳，3個course 嘅lunch 只收 MOP198，3個course可以任選頭盤、湯、primi、secondi或甜品。佢地係 open kitchen，兼有明火烤爐用嚟烤pizza。 我叫了cold cut 作starter，o.k.。蕃茄燴大通粉，個蕃茄汁一流。 朋友們叫的starters 包括：tuna carpaccio , 牛肉carpaccio ，燒墨魚等。主菜linguine、墨汁意粉、燒和牛、Salami Pizza。大家互相 share 一点，我覺得都好味而骨子。個 pizza更係我理想的味道，薄而略脆。 甜品menu好像無乜特別，大家都免了，留肚再戰 afternoon tea。呢間餐廳食品品質、服務都好，價錢相當合理，以後一定多多幫趁。只是冷氣都幾凍，我都頂唔順！