粥麪館

星期日中午到鰂魚涌嘉里中心的粥麪館食粥，呢間店據說由一位退休的粥麫大師傅主理，值得去試下。

裝修簡單，傳統的粥麪有很多選擇，我選了一碗金牌咸鷄粥、油炸鬼和一碟白灼腰膶。

油炸鬼先來，仲係熱和脆，可能係用一直用焗爐熱住。

鷄粥和白灼腰膶一齊來，過粥底果然幼滑、很傳統的靚廣東粥，無生記咁杰，很啱我胃口，正。

腰膶都爽而夠味、腰無乜異味，我慢慢將一片一片腰、膶放入粥內灼熱來食，正。

我見其他客人食的麫也很正，下次試下。

總結，果然名不虛傳，好。

私房蔡

12月29晚，與朋友到大坑施弼街的煲仔飯名店「私房蔡」吃晚飯。訂位時佢地都話咗到時可能要等枱。我地去到門口很多人在等，門口姐姐已經同無訂位的客話不用等，無訂便無位。

我們等位時已經落定柯打，由店員帶往附近的分店坐街邊台，我行去 BRIX買枝 rose酒，不用五分鐘回來，碟椒盐鮮魷和啫啫芥蘭煲剛也送到。

椒盐鮮魷非常唔得，漿太多而不爽口，啫啫芥蘭煲落單時話有蝦醬落去啫，送來的煲一點蝦醬香味也沒有，只能當雜菜煲食。

不久我地煲北菇鷄飯加臘腸也送到，果然有優等飯焦，料的味道就普普通通。

因為在路邊桌而當晩有雨，佢地擺定枝大傘遮雨，有位哥哥常常來打點，以免我們和旁邊客人 dup 到雨。

總結，煲仔飯果然好食，而且服務都唔錯，可以再來。

Les Miserable

昨日去看電影版的 Les Miserable，中文戲名譯作「孤星淚」不夠洽當，應該按原著稱為「悲慘世界」較乎合內容。

這部戲除了賺人熱淚，幾個主角都很出色，尤其女主角在被奪去尊嚴處於絕境下、哭訴地唱 I dreamed a dream，極度感人。也由於演員唱著歌詞，觀眾有充足時間感受演技，個導演又大量使用 close up，發揮了電影版音樂劇的優勢。

這個故事包含了宗教、親情、公義、革命理想。看到一班青年學生、眼見社會不公要攪革命，不禁想起施永青以前在電台講過「革命是浪漫的」，也想起六四的熱血青年。這種時代背景，必有像羅素高爾演的監獄長和警官，一派法在我手，以法殺人，以法維穩。果D發指引不讓李克強訪港時遇到難堪的維穩香港公安頭目，遲早都有戲中的監獄長的作為。

男主角受神父點化，終生救助他人，發人深醒。

完場前一幕，各在生時受苦受難、追求公義的角色在廣場上為希望和公義高歌，讓觀眾帶著希望和安慰而離場。

這是一部我很久也會記得的好電影。

Uno Duo Trio, Lana's Italian Home-cooking

以前看過雜誌介紹，呢間由一個靚女大廚主理的意大利餐廳，今日趁得閒走去食午餐試下。我12點半到，仍未有其他客，我1點半食完也只有三台客。

佢地 lunch set menu 以一、二、三、四道菜，來分價錢，我選頭盤、湯和 primi，收$148 加一。

先來二片麪包，平平。

頭盤我揀 mushroom on toast，D菇幾靚但無味。

Cream of Cauliflower湯就幾好味，而且夠熱。

Primi 我揀了青口天使麫，上桌時好香、好多蒜味。D青口就雪到無哂味，天使麫也很一般。

總結，裝修典雅，但味道一般。D嘢好慢，趕時間絶不適宜。

View 62

一連幾次食西班牙菜，今次是位於合和中心，會旋轉的 View 62 by Paco Ronxero。呢間店的主理人，在西班牙的餐廳有米芝蓮二星，主打分子料理。

我與朋友在12月26日去食晚餐，之前已上佢地網頁看了餐單，有a la carte, set menu 和 tasting menu，我們都係叫 dinner set menu，有三味小食 starter，一款tapas，頭盤、主菜和甜品各一。我地再加一客西班牙火腿。

餐前小食都是分子料理，不算美觀也不好吃。

Tapas是一杯粟子湯，放幾粒菇菌，上面一層泡，呢個湯幾好飲。

呢份36個月的黑毛豬火腿算一般，D肥的地方很油。配上的多士，上面塗了 olive oil 和小小蕃茄容，只有呢幾片多士好食過 BCN的！

頭盤我地都係叫燒豬腩配紅蝦，左面白色的豬腩，百分之八十是肥膏，D邊都燒得幾香脆。紅蝦一般，右邊匙更內是蝦膏，咸咸地幾好食，炸蝦頭就炸過籠，呢味菜很易餸酒。

主菜我叫西冷牛肉，侍應話係 slow cooked ，我食唔到有乜特別。伴碟有三小塊豬腩肥膏包薯仔，無味的。

朋友主菜叫龍蝦意粉，好似幾香濃，但也不特別。

甜品我地都係叫心太軟朱古力餅配雪糕，無乜特別。

見到呢碟 petite four 同robuchon 比太寒酸了。

總結，食物遠低於預期，絶無驚喜，合和也太唔就腳，唔掂。

Robuchon au Dome

澳門 Robuchon 搬了過新葡京幾個月，卒之找到機會可以去食番餐。店內裝修並不特別，入門有鋼琴，有人演奏。個蛋形建築，不倫不類。還好，伙計們仍然友善欣勤，但也明顯多了來自內地的服務員。

佢地晚餐 a la Carte 很少 choice ，印象中舊店較多選擇，大慨依家上得嚟嘅都叫 tasting menu 卦。

除了a la Carte ,就是一個 dinner menu 和 一個 tasting menu，我點了 dinner menu 加兩杯餐酒。 wine by the glass 也很少，三款香檳，紅、白酒各只四款，$200 一杯起，而且平平無特式！麫包是一貫的好高水準。

先來 amuse bouche ，右邊橙色是咸咸地的 mousse 。左邊是 puff 球，幾鬆軟。

第一道菜是芝士 mousse ，下面只小片 artichoke ，上面有幾片黑松露，完全食唔到 truffle 味。 artichoke 就好夠味，小小爽口。

第二道是蟹肉包在生菜內，加入芝士和牛油果，味道和口感好趁，蟹肉勁夠味，個蟹肉包外面又有幾片無味的黑松露。

第三道菜是以 foie gras 和其他配料釀入長法飽內，切件畧煎過上碟。入面D配料有菜頭粒、黑松露碎、有D好好味咸咸地的醬。這道菜是全晚最特別而最好味的一道菜。

第四道菜是煎帶子，好味，面畧焦而入面軟。一間好餐廳煎帶子一定好。汁好味，旁邊的不是魚子醬，是墨魚汁做的粉粒。

最後一道菜是燒和牛肉、切粒，普普通通，可惜只是配炸薯仔，雖然不錯，但我最喜歡他們特制的 mesh potato 。

跟往嚟一杯Rum 酒做的鉋冰，上加椰子汁做的 mousse。幾好食。

之後侍應推來甜品車，她說還有幾種雪糕可揀。我已經好飽，只揀了一件 Napoleon和朱古力餅，水準很高。

跟住侍應推來一車 petite fours，我只能很開心地笑，揀了二款小甜食。

總結：食物好味，有心思。一間三星餐廳是會讓你食得很開心，當然你付的價錢也令店主笑得開心。

增輝藝廚

12月17日參加了朋友組織的一圍能吃能喝、有食力人士，到深水㻉名店增輝藝廚吃晚飯，酒和菜都是頂好。

十個人帶了四枝紅酒、二枝白酒（Chablis 、Meursault 各一）和一枝南澳洲甜白酒。

先來兩款該店特式小食：鬼馬炸油條，將油炸鬼切開，涂上蝦膠，畧為焗熟，好好食。炸魷魚仔，普通。兩小食皆宜佐酒。

跟住是第一道主菜燒乳豬仔，比我吃過的喜萬年、金斗記等各有千秋，這隻豬仔可能太細，除了皮，下面幾乎沒有肉。

跟住也是兩款豬小吃：燒豬腩仔，幾好。豬腳仔就頂好，好似熏蹄味而好淋。

之後係近四斤重的北海道長腳蟹，清蒸，唔係成十個人，真係食唔哂，腳裏的肉又軟又鮮味，身的肉就較實，可能蟹大隻難控制火候。

下一味又係該店名菜「鮑蔘鷄」，係以鮑魚仔和其他配料，釀入鷄內去炆，蠔油鮑汁味濃，鷄肉比較老，鮑魚仔就又淋又入味。最勁係食完哂D肉，伙計攞碟熟咗的烏冬來給我們撈咗D鮑汁食！

跟住嚟炸廣島蠔，皮脆而入面舊蠔好濃味而juicy，皮上面有少少黑椒或某種椒粉末，好襯。我地食完至覺得....咦，好似無叫，不過呢味係我認為全晚最好食的一道菜。

女店長介紹食的刀貝，類似扇貝，粉絲蒜容蒸，普普通通，可能已經有D飽啦。

跟著又係該店名物，蝴蝶腩，鑊仔上，下面有火熱住，慢慢加菜，當火煱食。蝴蝶腩食落無乜特別，可能已經太飽啦。

其他還有炒芥蘭。甜品是炸芋球和炸琉蓮。

總結：環境不佳，好嘈，除了女店長、伙計都唔醒目，有個伙計擒擒青攞咗支2000 bordeaux去開，撹到個木塞段在瓶內！皮氣差D可能反面有份。食材質素㥛好，煑功不錯，似乎炸物較佳。可以多D嚟。佢地門口兩邊都係魚缸，好多法國麫包蟹呀！