伊豆北川 望水 （上）

計劃這次旅程時，上 一休.com search 伊豆的溫泉旅館，提前約兩個月，選擇也不多，因為很多旅館都不接受一人訂一房，二人一房就大把。選了第一晚的正平莊就大失所望一無是處，第二晚的望水就超級好。

我經 一休.com訂房後不久，呢間旅館就發電郵給我（日文的），問我當日開車定坐火車，如坐火車佢地會去接，又問我是否要訂貸切風呂，什麼時間，我用英文回附以漢字。之後佢地就寫英文（是和式英文），又問我晚餐揀邊個套餐和是否有食物敏感。

順利到達伊豆熱川駅，坐了他們的麵包車（同時都接了近十個客，可能大家都算準大慨3點才可 check in。到了酒店大堂，真的好 impressive ，大堂全大玻璃，外面便是太平洋，下面波濤洶湧，上面藍天白雲。該酒店頗新，依山而建，lobby 是八樓，也是頂樓，房間是和式，

我間房在七樓，有個窗台，落地大玻璃全海景，並放了兩張椅和一部 CD機，可以攤著看黃昏（因為面向東所以看不到日落）。

大浴場和貸切風呂都很好。

伊豆北川 望水 （下）

晚餐和早餐都開在房內，晩餐的刺身有龍蝦、響螺和五、六種魚，仲有撈咗汁的蝦和鮑魚，好豪。後面D熱食其中較特別是用大香菇釀肉的包，好味喎。

龍蝦頭就利用來煑第二朝早餐的味增湯。

我住過十幾廿家溫泉旅館，呢間 最ichiban 。非常滿意。

伊豆長岡正平莊

9月27日離開東京往伊涭溫泉，第一晚住宿於伊豆長岡的正平莊，這間溫泉旅館在 一休.com 的評分很高，點知令我大失所望，大浴場和露天風呂很細，無特式，房間大和有一露天浴缸，但所謂露天風呂都係用棚摭住哂。
食物是典型的好睇唔好食。
最大鑊係只有在reception 附近一小點地方有 wifi。 斷 wifi 係現代十大酷刑之首。

銀座小十

2009年10月，我第一次按米芝蓮東京版（當時還是剛有第一年）在東京吃名店，首次選了這家第一次入選便得三星的銀座小十，真係色香味都是爆哂燈，令我大開眼界。之後也試過想再去，但都訂唔到位，今次提早一個月，叫酒店幫我訂，但也只能訂到第二輪，8點半開始。
佢間舖原本在銀座小街的街舖，約一年前搬咗上一座商業樓，入內也是一排吧枱8個位，另一邊應該係個室。以前只有造晚市，依家仲有午餐。

除了主廚奧田透，有1、2個助手有D好似五年前見過。現在有五、六個助手，都要用英語介紹食物，輔以食材書的圖畫。大廚話最近在巴黎開了分店，每月3個星期在東京、1個星期在巴黎，仲做出一個好累的表情。

先上蟹肉酸酸地海鮮汁啫哩，呢味嘢好多料理店依家都做同樣的前菜。小什這便顕得一般，份量就算多。

之後係煑熟鮑魚切粗絲，下面係一種豆做的醬伴好似蠶豆的豆。鮑無乜味。

跟住係鱧魚切到球狀滾湯、湯內有松茸，呢味好食，切個球好巧功夫。

之後係刺身，由師傅表演刀功，佢仲在每塊拖羅用刀戒坑紋，像廣東炒鮮魷咁。每種魚都係無涭漬的，好滑。

我們一輪的客入座後助手便開始用碳爐烤鱧魚球卷，同五年前食的一樣，大慨鱧係夏末初秋的時令食材。今次還有和牛幾舊，D和牛香而無甦味，無渣，外面脆脆地，內面畧紅而沒血水，高手用高級料，好正。佢同上次一樣用秋葉伴葉，像圖畫一樣。

跟住係煑八爪魚腳，夠淋。

我見個助手燒完我地的鱧和和牛，跟住在碳爐又燒兩條鰻魚（係半吋厚的），我以為係入面個室仲有客，點知原來係給我們餸飯！每位客人約六、七舊。飯是用沙煲仔煲的，但無乜飯香，鰻魚就好香，而且唔係一般蒲燒鰻咁查大量甜豉油。

當我們吃飯時，主廚自已清洗刀具、桌面，然後站在枱後，看客人有乜問題或評價。

甜品是 sorbet 和水菓啫哩。


總結：燒烤仍然有好高水準，其他的食物則可能我呢幾年已經成為日本料理精，所以不覺特別。但該店仍然藉2、3星，希望主理人不會因為打理巴黎店而分心。

吉祥寺

9月26日，星期五，睛，白天出猛太陽。

早上先到 渋谷的Towers Records 逛下買CD。

趁天氣好，吃個簡單午餐便坐火車到吉祥寺、井の頭恩賜公園一帶行下。

吉祥寺駅前幾條商店街像大阪心齋橋但無咁多人。據說這裡的藥妝店的東西比東京市內平。

中道通最合我心意，一條小路若500公尺，兩旁都是特式小商店，叫做雜貨店，其實係精品店。

銀座久兵衛

這是很有歷史的高級壽司店，我提早成個月用電郵叫酒店幫我訂 counter 座位，本來擔心這等高檔老店很高斗，但氣氛輕鬆，幾個師傅跟客人談笑風生，替我弄食物的師傅會簡單的英語，幾個女侍應也能說很清楚的英語。
他們有三、四種套餐，當然也有散叫的魚生、壽司和熱食。我叫了一個較貴但不是最貴的套餐。我坐吧枱旁邊的三個日本中年男女，我未入座佢地已經食緊，食物不斷咁來，我食完埋單佢地仲未食完！佢地食D嘢好特別，其中每人一隻活的大虎蝦，活剝拿出緑色的膏，伴蝦肉吃。總之serve佢地個師傅講下講下又攞一樣上來，無論食材和處理方法都令大開眼界。我個套餐在香港算超級但比起佢地的食物好似普通咗。

開始是幾種魚生、鮟鱇魚肝、一種貝、生蝦（活剝殼），熱前菜還有煑淋的鮑魚、燒吞拿扒（好食、好滑而不會成口油）、小點的燒蝦頭、燒海馬（我都未食，想都無想過）、燒八爪魚腳。

食食下一個看來六十幾歲的老師傅來跟客人打招呼，佢知我由香港來，轉身入內攞咗張紙俾我，話這張是佢的 nane card ，原來係 Wall Steet Journal 訪問佢的文章影印本，這個便是老闆本人。

跟著是壽司，其中海膽也是從一板的來貨夾，但海膽鮮而味濃，上等貨色。然後有些食咗唔知乜名堂的壽司。個件燒鰻魚真的一流，我未食過咁香兼熱辣辣的鰻魚壽司，非常得。師傅造壽司後會按食材在上面掃各種醬汁或磨柚子末。

之後係當造的松茸土瓶蒸，三種手卷，玉子（好滑），最後師傅用大刀批兩塊薄薄的蘿蔔片，夾紫蘇葉芝麻，話愛嚟清下個口。

最後係非常甜的日本蜜瓜。

總結：食物質素極佳，師傅功架優良，一邊跟客人聊天，一邊用神地炮製食物。佢地是生魚壽司為主，輔以一些熱食小吃，非常好。氣氛輕鬆，與以前吃過的壽司匠是兩個方向，壽司匠是漬過的魚為主打，氣氛較嚴肅。但兩家都是超好，套餐價錢也差不多。

船橋屋天婦羅

我常去新宿三丁目的店「つな八 総本店」，未去過斜對面的船橋屋，今次去試下吃午餐。

感覺船橋屋比「つな八」較粗，D食物有點炸過籠。食咗幾件天婦羅，D白飯、漬物和湯就上晒，人地係最近才上飯的。

個甜品橙嘟哩就好好食喎。