銅鑼灣世貿中心9樓，以前 At Corner 的舖位，最近開了間蟹家鐵板燒，賣蟹又做鐵板燒，有D怪。11月30日中午與朋友往試其午餐。
佢地午餐定食有十多款，我選了蟹鍋定食（$150），沙律好食，刺身是三文魚三片，我不喜歡吃三文魚的，但也不錯，主菜的蟹鍋有大蟹腳兩段、蟹身兩舊，但湯太咸，致食唔到蟹味。
朋友叫蟹家刺身定食，也是$150，有幾舊蟹肉、一隻蝦和其他魚生粒，看來不錯。
他們也有些一百元以下的午餐定食，以後可以試下。
2012年11月30日星期五
2012年11月11日星期日
得龍大飯店
11月10日夜，與朋友共八人到新蒲崗的得龍大飯店吃晚飯，提前幾星期訂了位，但openrice 上很多人都話訂咗位準時人齊都要等位，所以我提早近半小時到，幸好有空桌，可以馬上入座，慢慢等齊人。
預早訂了著名金錢鷄8件、鴨腳包、古法太爺鷄半隻、一窩豬肺湯。人齊後再現場點津白、砵酒焗桶蠔、椒盐魷魚豆腐、籠仔蝦糯米飯。
佢地唔收開瓶費，我帶了一枝香檳、一枝2009 Burgundy 、朋友帶了一枝2009 Pessac-Leognan，兩枝紅酒都頗宜配中式肉類菜式。
點了菜不久就一下上哂枱，唔知食得邊樣，也難以配合餐酒，只好先飲香檳、再飲 Burgundy 然後 Bordeaux。
先食金錢鷄，近年很多名店做番金錢鷄，但都不是我小時候燒臘店果種原味，呢處算 ok, 但蜜汁太多「痴立立」。
鴨腳包好特別，是以鴨腳的皮包（或卷）幾種肉、肥膏、燒肉、肝等成為一卷然後再厚切上碟，好似法國佬的 Terrine，幾好食但卷內食物各顧各，有D鬆散。
砵酒焗桶蠔，蠔味係好濃，賣相古怪但好味。
古法太爺鷄，鷄皮有D煙燻味好香，鷄肉嫩，好好味。
籠仔蝦糯米飯，本來點菜時要籠仔蟹膏糯米飯，但嚟到蟹變咗蝦，糯米飯乾身啱我口味，蝦就無乜味。椒盐魷魚豆腐，普普通通。
食完未夠飽，加多個羊腩煲，普普通通。
總結：服務一般，坐位不算舒適。食味不錯，焗蠔和太爺鷄極好味。
2012年11月4日星期日
尹師讌
這是一個忙於出差，忙於揾好嘢食的季節，11月2日旁晚從華東回香港，便滙合朋友往尹師讌食蟹餐。
尹師讌的主廚老闆，早年在日本做中菜廚師，頗出名，近年回流香港，之前尹師讌開店於跑馬地，專做私房菜，懷石式中菜，好似要訂成圍，故未有想去食。原來該店已搬到灣仔一年了。早一星期見爽報有廣告介紹佢地有荷蘭入口的大閘蟹套餐，所以來試下。
德國和荷蘭近年河裏大閘蟹繁殖成災，歐洲人怕怕，大慨免費任你收，據說歐洲的大閘蟹也是秋天最好。今年香港也有得賣，我相信呢D無藥、無污染野生蟹應該好食。
朋友帶來30年的塔牌紹興花雕，熱飮真的很好味，有回甘口感。
當晚只供應一種套餐，主菜的一隻荷蘭大閘蟹，大半隻手掌大小，蟹身很乾浄，蟹鉗邊有金毛，大慨吃了鬼佬水土，長出金毛。我地食的都是雄蟹有D膏，膏有原裝大閘蟹的膏味，肉不多但鮮甜，好食，配以陳年花雕，超正。食完蟹，俸上一大杯菊花薑茶。
其他菜式一般，個冷盤中的帶子畧醃過，好好味。蟹肉伊麵也很好，好多年未食過蟹肉伊麵，可以懷舊一番。
地址：香港灣仔告士打道171-172號安邦商業大廈１字樓全層
訂座電話：34843149
2012年11月3日星期六
上海鮨大山
10月29日到上海出差，晚上搵食，曾經有雜誌介紹過呢間東湖路20號的日本料理，專做 Omakase 套餐，我沒有訂位，六點前便去到，有位便試下。
佢地只做晚餐，每位收八百人民幣，既然嚟到，又有位，便試下。該店有一吧台，若可坐十人，由日藉大廚加兩三名當地人助手主持，我也是坐吧台。好像另有幾間日式個室。
坐在吧台前的客人，隨了我有三個日人有一位似乎也是第一次幫趁，另一對男女似乎是熟客，另有一對香港人男女，幾個內地人。日本客人可以與廚師溝通，鐘意食乜、今日有乜好嘢等等，我就只是由助手問我有乜唔食，我話唔食魚子。
在吧台後有一列一盒放了魚生、有些是醃過的，準備做刺身、壽司。
第一道菜是刺身，熟墨魚好林好味（可能醃過）。甜蝦兩隻，ok。赤貝無味，白身魚都不錯，很新鮮。
跟著來一杯磨菇湯。
跟著是燒鱔，皮燒得脆好香，果兩小舊檸檬好香檸檬味，加上切小粒的䓤，錦上添花。
跟著是醃過的魚肝，普普通通，全靠個汁和小䓤粒。
跟著是主角：壽司，魚都好味，飯偏大粒和酸，再來切碎拖羅飯，極正。最後主廚做了個呑拿魚子手卷給我，我接過了旁人才跟他說我唔食魚子，我話無所謂照食。
跟著是蝦頭做的麵豉湯。
總結，總體不錯，用料、味道、份量都可藉得800人記，但在香港用一千蚊港幣可以食到更好的日本料理，大慨在上海、在酒店以外的高級日本料理不多。
電話：021-54047705
訂閱：
文章 (Atom)