投資者週記

(一)中信總公司買起中信泰富的澳元外滙Accumulator，榮智健唱：世上只有媽媽好…..

(二) 過去一週曹仁超有幾段精華


過去一年，分析事物最準確係Nouriel Roubini：一、佢响10月24日估計未來美國經濟衰退係L型。二、佢認為道指將由近日高位9600點再跌20-30％。三、佢認為2009年秋季美國經濟才見底。四、唔好投資商品、股票、物業，最吸引係日本政府債券，並建議响適當時刻放棄美元，改為持有歐羅。五、佢認為全球股市進入功能失調（dysfunctional）期。六、佢擔心情況較佢估計更壞（去年佢形容係金融列車出軌，即逐個車卡出事）。七、退休金損失30-50％，令退休人士大受困擾。八、經此一役，好多人從此唔再涉足投資，令大氣候改變。上述猜測會否應驗？唯有騎驢看書（走着瞧）。我老曹唔知股市何時見底。

================================================================
發達十法：
一、創立一間成功企業；
二、成為大企業CEO；
三、成為超級巨星如劉德華、張學友；
四、取得奧運金牌，如體操明星李寧、短跑冠軍劉翔；
五、嫁個有錢人；
六、成為知名藝術家如張大千……；
七、用別人錢從事投機行為（OPM）；
八、寫世界出名小說如《哈利波特》；
九、做房地產生意而懂得把握機會；
十、學會管錢，例如森池兄。今天唔少人先至發覺原來唔少投資銀行係唔識管錢，只知道分花紅；可惜大部分人响金融海嘯發生後才知道。

=======================================================

全世界都得咗「美國病」，不但國家欠債，連政府、企業及個人都欠債。例如冰島人平均欠債額已超過美國；南韓家庭負債率亦超過美國（韓國央行11月2日宣布，截至今年6月止，韓國家庭應償還年貸款利息達49.9萬億韓圜，佔可支配收入9.8％。韓聯社表示，韓國每戶家庭平均負債3960萬韓圜係歷史上最高）。戰後至今六十多年，全人類都學曉借錢買樓可致富，但日本人自1990年至今借錢買樓卻損失慘重；香港人1997年下半年借錢買樓者，到2003年年中亦好慘，最近五年先叫做透透氣，但今年下半年起本港樓價又再次出現較大幅度回落（今年上半年本港樓價除豪宅外，大部分樓價仍未見1997年上半年水平）。當人人相信一套理論之時，呢套理論往往出錯（群眾常常作出錯誤決定）。2006年後美國人亦開始後悔買樓；2007年後英國人亦開始後悔買樓；2008年起中國人亦加入後悔買樓行列。隨住戰後嬰兒步入退休潮，各國樓價一個接一個進入回落潮。

================================================================

過去投資銀行槓桿比率達到1比40，即每100元投資中只要出現2.5元損失，投資銀行便失去全部股東資金。2007至08年投資銀行點止每100元投資損失2.5元？紐約市長彭博估計，未來有十四萬金融從業員失業。工業亦唔見得好，10月份通用汽車銷售額下降45％、福特下降30％、日本本田汽車下降25％及豐田下降23％。