李純恩 : 一山還有一山高

2009年10月24日 - 李純恩 : 一山還有一山高

這天在外吃午飯，食客之間的話題，很多是在說當天《蘋果日報》的頭條新聞題目：「煲呔衰過老董」。
廣東話傳神起來，普通話遠遠不及。「煲呔衰過老董」這句話若譯成普通話，就是「煲呔比老董還差」，那就沒有廣東話那麼鏗鏘有力了。
食客們議論紛紛，數落煲呔的不是，言語之中，竟念起老董的好來。
「老董係固執啲，講嘢差啲，反應遲鈍啲，但係個人唔壞呀，唔係咁縮骨，佢能力有限，但真係睇得出想為香港做啲嘢，而唔係為自己做啲嘢。」
「係呀，搞到一鑊泡，係能力問題，心地唔差嘅。更加唔會一朝得志，語無倫次。」
「老實人嚟嘅，唔係咁滑頭。人哋本身係做老闆嘅，所以都唔會有打工仔心態。」
「當時睇佢唔順眼，話佢蠢，家睇吓，又唔係咁唔順眼噃，精仔又點呀！精仔笨起上嚟，仲醜樣過蠢仔啦！照家睇，老董唔算蠢，仲有啲憨直㖭！」
「係呀，起碼唔蠱蠱惑惑嘛！家真係有啲掛住佢。」
聽到最後一句，才知道現在情況有多糟糕，但這還不算最糟糕，最糟糕是，有朝一日，當煲呔的繼任人上台之後，香港人集體懷念起煲呔，那才真正趴街囉！