MIC Kitchen

3月15日，與朋友到呢間廚魔分店吃晚餐，該店在觀塘巧明街AIA大廈的地舖，店不大。主打中西 fusion 分子料理，已經有米芝連一星，廚魔本店 Bo Innovation 最近就攞到三星，據說兩店的菜式不同。

佢地晚上供應 tasting menu 和 chef menu 各一，也有 a la carte，我地當然要試下個tasting menu，每位$850 , wine pairing 加$450。

第一道前菜叫 Oyster 冬蔭功，上面一粒粒珠珠是冬蔭功味的汁造的啫哩，有小小酸辣，𣎴是我習慣的冬蔭功味，綠色的醬唔記得係乜，最下面係蘇格蘭生蠔，非常夠鮮味、爽口。

第二道前菜叫 Tomato ，三件小點，左起蕃茄味棉花糖，非常有想頭的一樣食物，入面有D油狀的汁，好好味。中間是小蕃茄，唔覺有乜特別。右面是蕃茄糕，口感好。

第三道前菜叫臘味飯！用小煲仔上，打開煲蓋真係聞到臘腸氣味，內裏一球係帶小小鵝肝做的 mousse，上面沈咗D脆的粒，D臘味味好似係從呢D粒粒來，得意但難說好食。

跟著是牛肉湯，先拿來湯碗，碗內放了一粒和牛肉造的雲吞、一件牛筋、一舊蘿蔔，伙記從茶壺將湯倒入碗內，湯有好濃牛腩味，湯和幾件配料都好好味。

跟著係咖哩蟹，上面是用咖哩汁和蟹肉做的漿，下面是蟹肉和蛋白，唔識形容。其實想做賽螃蟹的 feel，不應加咖哩。

跟著係一小杯 cocktail 作為清口之用。

跟著係第一道主菜，焗鱈魚，沒有煑過籠，上面淋咗麵豉汁做的醬，再放一塊炸紫菜，伴碟係一舊芥蘭糕，用芥蘭汁做的糕似蘿蔔糕咁造法、畧為煎香非常好食。

第二道主菜係燒羊架，幾好食，上桌時聞到有DD中式燘羊腩的氣味，肉質係上等嫩羊肉。朋友唔食羊改做 slow cooked pigeon，我試咗一舊，好嫩滑。

甜品係三種用椰汁做的啫哩、波子和雪糕，都好好食。

總結，有D心思的創作料理，有一半餸好食、另一半唔啱我，服務唔錯，但 wine pairing 的選酒極差，唔係太酸就太甜。