點解

又出差幾天，香港政客又出醜聞，而且係特首。佢自稱做了四十年公職，未試過依家咁對經濟咁擔心，哦，咁就盡快攞 jet-so？遲啲話唔埋D富豪嘅私人遊艇、私人飛機都無哂？ 曾蔭權今朝到商台節目解畫，但我仍有下列問題： 你話去日本坐私人飛機，要與同行朋友各攤分費用，無問題。咁最近坐人家私人飛機到布吉島，就按商務位俾番每位5千幾蚊俾人。咁就多問題： 1. 香港到布吉來回坐商務位只是5千幾蚊？我願意出齊頭六千，唔該幫我買張吖。 2. 你去布吉渡假，係咪自己主動計劃？如自己主動計劃、有私人飛機的朋友如何得知？你是否主動跟有私人飛機的朋友講準備去布吉渡假？如果係咁，你心裡想博乜？如果是人家偶然主動提出，你儍㗎？咁都敢制？ 至於去澳門在人家的私人遊艇睡兩晩、並乘該艇回香港，你話以前都試過係咁。我就要問： 3. 你真係認為只係俾番單程船費就合規，無疑問？ 4. 你一個月搵幾錢人工呀？自己去住間好D嘅酒店、俾5、6千蚊真係俾唔起？ 你的問責團隊中政務司司長在任時撹僭建，你可以粒聲唔出去坐私人遊艇、私人飛機去渡假？