大班樓 The Chairman

約兩年前，偶然走過九如坊見當時新開的呢間大班樓，個名幾得意，唔知同鄭經翰有無關係，菜式標榜古法及每日早上廚師到街巿買鮮肉鮮菜，一直未有機會試，到佢地攞到米芝連一星，至知原來呢間嘢蔡東豪有份。早排由朋友組織訂一枱吃晚餐，6月24晚吃，卒之一枱只有6人（一位是小妹妹添）。


有些菜按介紹要預訂：蝦籽琵琶蝦（預訂後，佢地覆話無）、古法燒金錢雞、十八味雞。去到後再叫，頭盤：蝦油法國芥籽末伴鮮魷、九層塔辣椒膏炒蜆，主菜：雞油花雕蒸大花蟹配陳村粉、牛頸肉炒芥蘭、上湯腐皮浸菜蕊。


蝦油法國芥籽末伴鮮魷：幾特別，鮮魷淥得剛剛熟而爽口，但芥籽末太多，傍邊一堆豆角，也是爽脆但太多芥末。

九層塔辣椒膏炒蜆：汁太濃，食唔到蜆味，六個胃食人都可以食剩啲。大家留肚，一陣再發揮食力。

古法燒金錢雞：對我來說最吸引的一味，好睇又好食，面果層鷄膶好大片（伙記confirm係鷄膶），味又濃，好懷疑有無咁大個鷄膶，總之好食。

雞油花雕蒸大花蟹配陳村粉：蟹鮮甜，陳村粉索咗蟹汁混花雕，好好味，呢味確係very good。

十八味雞：可能太多醃料，有D苦。果陣混了醃料和豉油的肉味，一入該酒家就聞到，我唔係幾鍾意。

牛頸肉炒芥蘭：芥蘭好爽，牛肉片薄片，普普通通。

上湯腐皮浸菜蕊：也是普普通通。


後來再加蟹肉春卷、蝦餅各一碟，都只能算好吃。

甜品是杞子雪糕和杏仁茶，杞子雪糕幾特別但太甜。

更值一提，一位女士帶來了三枝酒共享：Champagne Brut Badie（由於兩頭盤都spicy, 唔好意思我用咗好多嚟朗口，準備吃其他酒菜）， 澳洲Felton Road Chardonnay (這隻白酒原來配海鮮很好），St. Julien Chateau Ducru-BeauCaillou 1995, 呢枝紅酒好正，畧為未 breathe 夠，已經好香黑提子味，入口不辛。