滙豐供股

滙豐卒之宣佈供股，兵荒馬亂，供唔供股成為熱門話題。
首先我手上沒有滙豐，可以作壁上觀。尋晚和今早睇埋美國ADR收市價，今早决定：如可$38入貨就買，@38計埋供股後的Weight Average 係$35，可以股價潛水三年也受得到，但邊有筍，全日都係$47左右，@47計埋供股後的Weight Average 係$41.4，咁就唔多吸引。而且12供5，實係攪到很多碎股，條條fing。例如我依家有1200股，即可以供500股，卒之有1700股即係1600股和100碎股，如果有4800股 (!)，即可以供2000股，咁先至完完整整地揸。

雖然結束大部份前Household International 的業務，但仍留下其Credit Card業務，真係希望佢地唔好再出大鑊嘢啦。

果D 四叔呀、誠哥呀都話供喎，呢次係霸王硬上「供」。

我認為供唔供股係要睇個人情况，加上下面考慮：
(1) 係乜年紀？年紀越大越應該多保留現金在手。
(2) 係咪可以忍受股價潛水三年？
(3) 若果有第二輪供股，又點應付？
(4) 無論如何不可把全部鷄蛋放在同一個籃裡，供股後單一隻滙豐不可佔總資產的20%。現在手頭越多現金未來一兩年大把機會買平貨。
(5) 如手頭有貨，份工無乜危機，上面4点都諗通，咁應該供。

我都係認為股票係買嚟賣，靠升值賺錢，收息係次要。