留家廚房 - 灣仔新店

2月15日，約了朋友們往留家廚房的灣仔新店試下，作為農曆新年第一次飯局。佢地才開咗個幾月，裝修偏摩登而光猛，主理人劉健威先生父子現場招呼客人，劉晉並介紹我地去睇佢地細細的魚缸，魚都是每天從鴨利洲街巿購入的海魚。

訂位時問咗如自已攜帶酒，佢地要收開瓶費，每瓶200元，相當重皮，喜歡帶酒的食友會郤歩，卒之我地係自攜一枝意大利汽酒，並幫趁佢地一枝紐西蘭 Pinot Noir，佢地又確係有5、6種飲各種酒的酒杯供使用。

從報刋介紹的菜式中，訂了三道菜：生扣鴛鴦鷄、72度醉乳鴿、蟹肉豆苗羹。佢有兩大特式：有5、6種鷄的菜式，鷄都用90天的鷄，夠鷄味。除了傳統的粵菜煮法，還有使用外國特別架生來幫助煮菜。

第一道是酥炸廣島蠔，蠔得香口，入面不算juicy，但蠔味相當濃，好食。

第二道是蟹肉豆苗羹，呢個羹就係先將豆苗雪凍、放入一個機器裏面打碎，菜變成幼粉，用嚟煮湯羹，口感好幼滑，幾得意也好味。

第三道菜是我認為全晚最精彩的一味：72度醉乳鴿，乳鴿醃後以72度的湯汁浸一段時間，才攞去炸，於是皮很香脆而入面的肉剛熟而不老，仲有酒香，鴿膶都俾埋，呢味送酒勁正。

第四道菜是蜆芥鯪魚餅，即係蜆芥鯪魚球造成餅去煎，呢味無特別，也不是不好吃。

第五道菜是生扣鴛鴦鷄，一隻鷄分兩種造法: 鷄肉造成金華玉樹鷄咁，夾火腿、冬菇同蒸，鷄肉滑但個芡畧太咸。鷄翼、連骨的肉、鷄腳、鷄頭（！）炸，香口，又係啱餸酒。

第六道菜是蝦子山根豆腐。呢個餸抅起我對灣仔醉湖的回憶，醉湖以前就在現今生記個舖位，約十年前結業，佢地有兩個必吃的菜：蝦子山根豆腐和蝦醬碎炸鷄。呢道留家的蝦子山根豆腐也不錯。

之後我地決定 encore 廣島蠔，和加一個荷葉飯。荷葉飯的飯不錯，但無荷葉味。

食完埋單，劉健威來送客，和我們站著聊了15分鐘，講他的理念，各種鷄的造法，仲介紹我地一定要嚟食陳皮牛肉餅，佢地呢度也做私房菜。我們也反映了200蚊一枝開瓶費太貴。

總結：沒有失望，好好食，好有心機做的中菜，招呼也良好，相當滿意，會多去。