Serge et Le Phoque

近來又開咗幾間法國小館，今日去灣仔呢間試下午餐。佢雜誌介紹，此餐廳由巴黎著名 Bistrot的主理人首次東來開店，店的位置近灣仔街市，舖位前身應係一間潮州食店。

我沒有訂位，周六下午十二點半到店門口，從玻璃看入面空無一人，以為無開門，到一點左右才有另一枱客，一家三口的法國人入來。

裝修簡單，樓面很高。佢地只供應三道菜午餐，每位$250！難怪無客。頭盤三揀一，我選露筍，主菜可選豬或魚，我揀豬。

點完菜，侍應先送上 amuse bouche，是鮮魷切成小條，伴的汁有小小冬蔭功味，幾好喎，心想千萬不要是亂攪怪味 fusion。

露筍上桌，嘩好睇之外仲聞到露筍味，露筍上面加了幾舊似菜蕊的花頭，個汁有小小黑醋，好味，但最得係上面沈咗D某種果的粒子，一粒粒烘過，好香脆好味。

主菜的豬肉，原來係燒肥腩肉，先說伴碟的三個小蜆，好鮮好濃蜆味，味道有D似潮州人的獅蛤，另外還有二片涼伴黑木耳，幾得意。舊肉好像沒有醃過，只有淡肉味，皮不算脆也畧不夠熱，但真係唔錯。另有一堆半透明爽口的配菜，吃不出是什麼，但難以形容地好味！

個法國人店長見我讚好食，再去切咗一舊法國牛油給我查麫包，佢話係手造的，真係幾好味，小小咸，似半軟芝士的口感，就咁食都唔覺滯，用來夾豬仔包一定無得頂。

甜品三揀一，我選店長介紹的一款，原來係2個似漢堡包又似 macaron 的餅，餅好香脆，入面一層好厚身好滑的雲呢拿 cream，好食。

總結，新派法國菜，注入本地食材元素，食味和煑功已經及得上酒店內的名店，招呼良好，但 wine by the glass的選擇不多。晚餐也是兩款套餐，沒有 a la carte。初次來的印象很好，吃得很滿意，一定要再來。