六福菜館

9月3日星期五晚，約了朋友共4大2小，冒雨往西貢六福菜館吃海鮮。
我地本來想去流浮山食黃油蟹，星期四打電話去游龍留枱兼留蟹，但老板娘好老實咁話今年黃油蟹唔靚，又貴 (每隻五、六百蚊!)，那以轉軚，由我决定去食米芝蓮一星海鮮店。

店子是三層的新裝修房子，地下可放一張大枱，入面係廚房。我地坐2楼，面積小，大嘅有7、8枱。

我地先前留咗蕃茄魚湯，濃而不腥。
我地只叫了3种海鮮菜式：
白灼中虾，ok。6隻「椒鹽焗鮑魚」，面係薄粉和少量椒鹽畧脆，肉真係幾淋，應該係此店。豉椒炒蟶子就麻麻。

反而其他餸菜更好：
沙薑鷄脚，好肉好味。客家木耳炆豬腩仔，D肉下面放有梅菜，D木耳好爽，個汁有南乳，因為我唔鐘意南乳味所以食咗一小塊豬腩仔試吓，好食過梅菜构肉多多聲。
椒鹽豆腐，呢樣應係全晚最好食的一味，個豆腐做成粗狀，炸好上碟似一堆金條。表面脆，入面豆腐淋，我未食過咁好食的椒鹽豆腐。
上湯浸唐生菜，好食。

埋單時我想問吓碟「椒鹽焗鮑魚」幾錢，先知道佢地係代買海鮮並收加工費，一斤蝦加6鮑魚共$246，加工費蝦收$46, 鮑魚收$90，其他餸菜都係幾十蚊一碟，價錢算合理。